Túrkistan oblysynda mal bordaqylaıtyn birneshe alań iske qosylady

TÚRKІSTAN. QazAqparat - Túrkistan oblysynyń Túlkibas aýdanyndaǵy sharýa qojalyǵy 3 myń bas iri qara maldy bordaqylaýǵa arnalǵan birneshe alańdy ashýdy josparlap otyr. Kásipker bul josparyn eki kezeńde iske asyrmaq, dep habarlaıdy QazAqparat.

Memleket basshysy kezekti Joldaýynda el ekonomıkasynyń ósiminiń draıveri aýyl sharýashylyǵy ekenin aıtyp, onyń ishinde etti mal sharýashylyǵynyń róline erekshe toqtalǵan bolatyn. Osy rette Shuqyrbulaq eldi mekenindegi «Adal» sharýa qojalyǵy jylyna shamamen 1200 tonna iri qara mal etin óńdemek. Atap aıtqanda, 1500 basqa arnalǵan alań bıyl iske qosylsa, 2019 jyly qosymsha 1500 basqa arnalǵan alań qurylysyn júrgizý mejelengen. Al, jobanyń jalpy quny 900 mln teńgeni quraıdy.

Atalǵan joba tolyǵymen iske qosylǵan jaǵdaıda 30 adamǵa jumys orny ashylady. Budan ózge, aýdandaǵy mal sharýashylyǵyna qajetti egin túrlerin egetin dıqandardyń ónimderine suranys arta túspek. Qazirgi tańda taýly aýdannyń aýmaǵynda osyndaı 268 alańshada 2200-den astam jylqy men 2 myńdaı iri qara mal bordaqylanýda.