Túrkistan oblysynda maqta alqaptary azaıady, dıqandar 1,6 mlrd teńge qaryzyn ala almaı júr

TÚRKІSTAN. QazAqparat- Túrkistan oblysynda maqta daqylyn egý kólemi azaıýy múmkin. Bul týraly Túrkistan oblysy ákiminiń orynbasary Ermek Kenjehanulynyń sharýalarmen kezdesýinde aıtyldy, dep habarlaıdy QazAqparat tilshisi.

Túrkistan oblysy ákiminiń orynbasary Ermek Kenjehanuly Jetisaı, Maqtaaral, Shardara aýdandarynda bolyp, maqta ósirýmen aınalysatyn dıqandarmen kezdesti.

Basqosýdyń basty maqsaty – osy saladaǵy barlyq máseleni talqylap, áli kúnge ótkizgen maqtasynyń aqshasyn ala almaı júrgen dıqandarǵa kómek berý.

Sebebi maqta óńdeý zaýyttarynyń sharýalarǵa bereshegi 1,6 mlrd teńgege jetken.

Alqaly jıynǵa Jetisaı jáne Maqtaaral aýdandarynyń ákimi, óńirdegi barlyq maqta zaýyttarynyń basshylary men mıkroqarjy uıymdarynyń basshylary, qos aýdannyń maqta ósirýmen aınalysatyn dıqandary qatysty.

Jıyn barysynda sharýalar men maqta zaýyttarynyń basshylary ortaq mámilege kelip, kókeıde júrgen suraqtaryna jaýap aldy.

«Ótken jyly maqta daqyly 126,3 myń gektarǵa egilip, 361,8 myń tonna ónim jınaldy. Bıyl maqta daqylynyń egis kólemin 14,9 myń gektarǵa kemitip, 111,4 myń gektarǵa egý josparlanǵan. Ózderińizge belgili 2022 jyly bastalǵan geosaıası jaǵdaıǵa baılanysty maqta talshyǵyn eksporttaý qıyn soqty. Bul shıtti maqta baǵasyna tikeleı áser etip otyr», – dedi E. Kenjehanuly.

Aıta keteıik, ákimdik agroqurylymdardyń múddesin qorǵaý maqsatynda maqta óńdeýshi zaýyttarmen kezdesýlerdi jalǵastyrady.

Foto: gov.kz