Túrkistan oblysynda qyzdarǵa qaraǵanda ul balalar jıi dúnıege keledi

TÚRKІSTAN. QazAqparat - Túrkistan oblysynda ótken jyly 61 186 sábı týǵan. Bul kórsetkish 2019 jylmen salystyrǵanda 9,6 paıyz kóp, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, 1000 adamǵa shaqqandaǵy týýdyń jalpy koeffıtsıenti 29,72-ni qurady.

Byltyr óńirde 13 463 otbasy neke qursa, onyń ishinde 9 316 neke - aýyldyq jerlerde, 4 147 neke - qalalarda tirkelgen.

Sonymen qatar, 2019 jylmen salystyrǵanda 2020 jyly oblystaǵy ajyrasý kórsetkishi 67,1 paıyzǵa azaıdy.

Búgin bul týraly óńirlik kommýnıkatsııalar qyzmetinde ótken brıfıngte oblystyq statıstıka departamentiniń basshysy Aıdar Ábildábekov málim etti.

Onyń aıtýynsha, byltyr oblysta 31 815 ul (52%), 29 371 qyz (48%) ómir esigin ashqan. Óńirde ul balalardyń jıi dúnıege kelý tendentsııasy saqtalyp otyr.

«2021 jylǵy 1 qańtardaǵy kórsetkish boıynsha halyq sany 2 mln 44 551 adamdy qurady. Onyń ishinde 20,4 paıyzy - qalalyq jerde, 79,6 paıyzy – aýyldy jerde turady. Demek, 2020 jylǵy 1 qańtarmen salystyrǵanda halyq sany 28 514 adamǵa ósken. Ókinishke qaraı, pandemııa saldarynan oblysta ótken jyly qaıtys bolǵandar sany 13 007 adamǵa jetken. Bul 2019 jylmen salystyrǵanda 24,9 paıyzǵa kóp»,- dedi departament basshysy.

Budan bólek, ótken jyly oblysqa 33 738 adam kelip tirkelgen. Al 53 403 azamat basqa óńirge qonys aýdarǵan.