Túrkistan oblysynda qysqa daıyndyq qalaı júrip jatyr

TÚRKІSTAN. QazAqparat - Túrkistan oblysyna jylytý maýsymynda qajetti qatty otyn kólemi - 1 003,2 myń tonna. Búginde tasymaldanǵany - 294,1 myń tonna, dep habarlaıdy QazAqparat tilshisi.

Bul týraly Túrkistan oblysynyń tótenshe jaǵdaılar departamenti bastyǵynyń orynbasary Erik Sarybaev aıtty.

BAQ ókilderiniń qatysýymen ótken brıfıngte óńirdiń qysqy kezeńge daıyndyq boıynsha egjeı-tegjeıli baıandaldy.

«2020-2021 jyldardaǵy jylytý maýsymyna daıyndyq barysy josparǵa saı júrgizilýde. Oblys boıynsha 586 kópqabatty turǵyn úı ortalyqtandyrylǵan jylýmen qamtamasyz etiledi. Qysqy maýsymǵa daıyndalǵany 442 turǵyn úı. Al 2623 bıýdjettik mekemelerdi aldaǵy jylý maýsymyna daıyndaý josparlanǵan, búgingi kúnge 2253 mekemede daıyndyq jumysy júrgizildi», - dedi Erik Temirhanuly.

Túrkistan oblysy jolaýshylar kóligi jáne avtomobıl joldary basqarmasynyń bólim basshysy Sherzat Súttibaevtiń málimetinshe, oblystyq mańyzy bar avtomobıl joldary qysqy merzimde kútip ustaý jumystaryna daıyn.

Jalpy 4152,34 shaqyrym joldyń 1943,3 shaqyrymy - birinshi kezekte qardan tazalanyp, ınertti materıal sebiletin joldar bolsa, onyń ishinde 434 shaqyrymy - taýly óńirlerdegi qar qatty basyp qalýy qaýpi joǵary aımaqtar.

Sonymen qatar, oblystyq mańyzdaǵy joldy qys mezgilinde kútip ustaýǵa oblystyq bıýdjetten 69 mln teńge qarjy qaralǵan. Joldy kútip ustaýǵa 354 jumysshy men 124 tehnıkany jumyldyrý josparlanǵan.

Sonymen qatar, qys mezgilinde halyqtyń qaýipsizdigin qamtamasyz etýge shuǵyl áreketterdi jasaýǵa jol mekemelerimen jedel habarlandyrý syzbasy bekitilgen.

«Joldyń jaı-kúıin kúndelikti baqylaý jáne tótenshe jaǵdaılar departametimen der kezinde aqparat almasý úshin táýliktik kezekshilik uıymdastyryldy. Sonymen qatar, aýa raıynyń qolaısyz mezgilinde jolda qalyp qoıǵan jolaýshylarǵa jaǵdaı jasaý maqsatynda oblystyq mańyzy bar avtomobıl joldarynyń boıynda 4 jylytý beketi ornalasqan. Atap aıtqanda, Báıdibek aýdanynda, oblystyq mańyzy bar «Qoshqarata-Jaryqbas-Birlik» avtomobıl jolynyń 28-shi shaqyrymynda «Shybyqbel» jáne «Ulanbel-Sozaq-Shaıan-Ekpindi» avtomobıl jolynyń 605-shi shaqyrymynda «Odamanbulaq» jylytý beketteri bar. Sondaı-aq, Sozaq aýdanynda «Jambyl oblysynyń shekarasy-Qumkent-Sholaqqorǵan-Kentaý» avtomobıl jolynyń 63-shi shaqyrymynda «Aşysaı» jáne «Ulanbel-Sozaq-Shaıan-Ekpindi» avtomobıl jolynyń 593-shi shaqyrymynda «Taskómirsaı» jylytý beketteri oranalasqan. Barlyq jylytý beketterin jyly kúıde ustaý maqsatynda kezekshi qoıylyp, 60 tonna kómir otynymen qamtamasyz etildi», - dedi Sherzat Anarqululy.