Túrkistan oblysynda kúsh atasy Qajymuqannyń keýdesinde synǵan tas tabyldy
Sozaq aýdanyndaǵy Shaǵa eldi mekenine qarasty Aǵalaq aýylynan tabylǵan tas úshke bólinip ketken. Ár bólikti bes jigit áreń kóterip, kólikke salǵan. Jergilikti turǵyndardyń aıtýynsha, munyń ózi Qajymuqannyń keýdesinde synǵan tastyń tórtten bir bóligi ǵana eken.
«Tarıhı tasty taýyp, bizge habarlasqan Shaǵa aýylynyń turǵyny Qabyl Qostanshaev pen Aǵalaq eldi mekeniniń turǵyny Baýyrjan Ábenov esimdi azamattarǵa úlken alǵys aıtamyn. Sol kúni aýdannyń belsendi azamaty Baqdáýlet Baımusaev ekeýmiz Shaǵa aýylyna jol tarttyq. Arada qanshama jyldar ótse de tastar sol kúıinde saqtalyp qalypty», - deıdi ólketanýshy Maqsat Qarǵabaı.
Jergilikti turǵyndardyń sózinshe, Qajymuqan Muńaıtpasuly Sozaq jerine Ekinshi dúnıejúzilik soǵys jyldary kelgen. Óńirdegi qyryq kolhozdy aralap óner kórsetip júrip, Shaǵa eldi mekenine qarasty Aǵalaq aýylyna toqtaǵan. Sonda eldiń kózinshe keýdesine úlken tasty qoıdyryp, jigitterge aýyl ustasy jasaǵan som balǵamen urǵyzyp, syndyrtady.
«Meniń anam Turǵankúl Báısheqyzy Qajymuqan palýandy óz kózimen kórgen. Keýdesine qoıylǵan tasty syndyrǵan oqıǵanyń da kýágeri bolǵan. Keıinnen aýyl adamdary ol tasqa eshkimdi tıiskizbegen. Alǵashqyda oshaq jasaý úshin bir-eki adamdar almaqshy bolǵanda, qarııalar tıyp tastapty», - deıdi Baýyrjan Ábenov.
Qajymuqannyń keýdesinde synǵan tas Sholaqqorǵan aýylynda ornalasqan Sultanbek Qojanov atyndaǵy Sozaq aýdandyq tarıhı-ólketaný mýzeıine qoıyldy. Mýzeı dırektory Nııazáli Dúısenbek jastardy ólkeniń tarıhymen tanystyrý baǵytynda bul jádigerdiń mańyzy joǵary bolatyndyǵyn jetkizdi.
«Biz aýdannan shyqqan sport sańlaqtarynyń jetken jetistikteri jaıynda arnaıy bólim jasap jatyrmyz. Tarıhı tastardy sonda qoıdyq. Aýyl jastaryn sportqa baýlý, ólke tarıhymen tanystyrý baǵytynda bul jádigerdiń orny bólek, mańyzy da joǵary bolady», - deıdi ol.