Túrkistan oblysynda quqyq qorǵaý ókilderine túrli deńgeıdegi marapattar tapsyryldy

TÚRKІSTAN.QazAqparat - Túrkistan oblysynda el Táýelsizdiginiń 30 jyldyǵyna oraı kezekti merekelik is-shara ótti. Saltanatty jıynda Túrkistan oblysy ákiminiń birinshi orynbasary Arman Jetpisbaı kópshilikti aıtýly merekemen quttyqtap, quqyq qorǵaý ókilderine túrli deńgeıdegi marapattardy tapsyrdy, dep habarlaıdy QazAqparat tilshisi.

Arman Jetpisbaev azamattardyń quqyqtary men bostandyqtaryn saqtaý mindettelgen sala qyzmetkerlerine oblystyń damýyna ólsheýsiz úles qosyp kele jatqanyn atap ótip, osy salanyń úzdikterine qurmet kórsetti.

«Táýelsizdik – basymyzǵa buıyrǵan bedeldi baq, abyroıly mindet. Biz, barshamyz osy tarıhı kezeńde Túrki jurtynyń rýhanı ortalyǵyn qaıta túletý jumystarynyń bel ortasynda júrgen baqytty azamattarmyz. Táýelsiz memlekettiń tiregi jáne qorǵany bolyp júrgen azamattardyń eńbegi eren. Búgingi tańda oblys boıynsha osy salada 4 myńnan astam azamat qyzmet atqaryp jatyr»,- dedi oblys ákiminiń birinshi orynbasary.

Saltanatty sharada oblystyq qoǵamdyq keńesiniń tóraǵasy Sháripbek Jamalbek te Táýelsizdiktiń qasterli uǵym ekenine toqtalyp, tártip saqshylaryn marapattady.

Jıynda prokýratýra, ulttyq qaýipsizdik, sybaılas jemqorlyqqa qarsy kúres, polıtsııa jáne quqyq qorǵaý salasynyń ózge de qyzmet ókilderine «Oblysqa sińirgen eńbegi úshin», Túrkistan oblysy ákiminiń alǵys haty men Qurmet gramotalary tapsyryldy.

Óńirdiń tanymal óner juldyzdary men mádenıet salasynyń ókilderi óner kórsetip, patrıottyq ánder shyrqaldy. Táýelsiz Qazaqstan men jańarǵan Túrkistannyń jetistikteri sóz bolyp, rýhty oıatatyn kontserttik baǵdarlama usynyldy.