Túrkistan oblysynda kópbalaly otbasylarǵa qaıtarymsyz memlekettik grant beriledi

TÚRKІSTAN. QazAqparat - Túrkistan oblysynda az qamtylǵan jáne kópbalaly otbasylar tobyna áleýmettik qoldaý sharalaryn kúsheıtý maqsatynda arnaıy shtab qurylyp, áleýmettik karta jasalyndy. Soǵan sáıkes oblystaǵy 86,6 myń kópbalaly otbasynyń 19 myńy az qamtylǵandar qataryna engizilgen. Bul týraly búgin Óńirlik kommýnıkatsııalar qyzmetinde ótken brıfıngte oblys ákiminiń orynbasary Erbol Sadyr málim etti, dep habarlaıdy QazAqparat tilshisi.

Erbol Sadyrdyń aıtýynsha, «Nur Otan» partııasynyń sezinde Elbasy az qamtylǵan jáne kópbalaly otbasylar tobyna áleýmettik qoldaý boıynsha birqatar tapsyrmalar bergen. Osy baǵytta aımaqta ataýly áleýmettik kómek kórsetýdiń jańa tártibi jaıynda eleýli memlekettik bastamalar usynyldy.

«Túrkistan oblysynda aǵymdaǵy jyldyń 1 sáýirinen bastap ataýly áleýmettik kómekke júgingen 56,9 myń azamatqa konsýltatsııalyq keńes berilip, oblys boıynsha qabyldanǵan 32 326 otbasynyń ótinishi «E-halyq» aqparattyq elektrondyq júıesine engizilgen. Búgingi tańda 24 748 otbasyǵa ataýly áleýmettik kómek taǵaıyndalyp, 21 608 otbasyǵa 4,7 mlrd teńge tólendi. Sonymen qatar, birinshi toqsanda kómek mólsheri qaıta qaralyp, 15 422 otbasyǵa kóbeıgen mólsherde ataýly áleýmettik kómek tólendi», - dedi oblys ákiminiń orynbasary.

Aǵymdaǵy jyly engizilgen ózgeristerge baılanysty shartty aqshalaı kómek 12 aıǵa, shartsyz aqshalaı kómek 6 aıǵa taǵaıyndalatyn boldy. Bir otbasyǵa ataýly áleýmettik kómektiń aılyq mólsheri orta eseppen 100-150 myń teńgeni, jyldyq mólsheri 1,8 - 2 mln teńgeni quraıdy. Osyǵan baılanysty qomaqty qarjyny tıimdi paıdalaný úshin jáne óz isin ashyp, qosymsha tabys tabý maqsatynda oblysta az qamtylǵan azamattardy kásipkerlikke tartý boıynsha jumystary júrgizilýde.

«Ótken jyldyń tájirıbesiniń negizinde ataýly áleýmettik kómektiń birjolǵy tólemine basymdyq berip, atalǵan qarjy esebinen oblysta ázirlengen 15 kishi bıznes-joba iske asyrylýda. Nátıjesinde 2019 jyldyń 1 toqsanynda 400-ge jýyq otbasy óz isin ashty. Qosymsha, «Atameken» Ulttyq kásipkerler palatasymen birlesip «Eńbek» memlekettik baǵdarlamasyna tıisti ózgerister engizilgennen keıin kópbalaly otbasylarǵa qaıtarymsyz 500 myń teńge memlekettik granttar beriletin bolady», - dedi Erbol Sadyr.

Oblys ákimi orynbasarynyń aıtýynsha, búgingi tańda oblysta kópbalaly otbasylarǵa arnalǵan «Yrys» mıkroqarjy uıymy tarapynan bir paıyzdyq 2 mln teńgege deıin jeńildetilgen shaǵyn nesıe berilýde. Osy maqsatqa qazynadan 100 mln teńge qarjy bólingen. Budan bólek, kópbalaly otbasylardy turǵyn úımen qamtamasyz etý boıynsha da tıisti jumystar júrgizilýde. Aǵymdaǵy jyly respýblıkalyq bıýdjet esebinen 1248 otbasyny turǵyn úımen qamtamasyz etý josparlanǵan. Qosymsha, oblystyq bıýdjetten halyqtyń osal toptaryna 44 turǵyn úıdiń (2309 páter) qurylysyna 7,3 mlrd teńge qarastyrylǵan.

«Kópbalaly otbasylardy turǵyn úımen qamtamasyz etý jumystary demeýshiler esebinen de júrgizilýde. Olardyń tarapynan 18 kópbalaly otbasy turǵyn úımen qamtylǵan. Qosymsha demeýshiler 34,3 myń kópbalaly otbasyǵa 285 mln. teńgege qarjylaı jáne zattaı materıaldyq kómek kórsetildi»,- deıdi Erbol Sadyr.