Túrkistan oblysynda kópbalaly analardyń qurmetine erekshe mýzeı ashyldy

AQSÝKENT. QazAqparat- Búgin Saıram aýdanynyń ortalyǵy Aqsýkentte «Ardaqty ana» mýzeıi ashyldy, dep habarlaıdy QazAqparat tilshisi.

Mundaı mýzeı elimizde tuńǵysh ret Túrkistan oblysynda el ıgiligine berilip otyr.

Onda altyn qursaqty analardy ardaqtaýǵa, olardyń eren eńbekterin nasıhattaýǵa, ár salada jetistikke jetken úlgili analardy qurmetteýge baǵyttalǵan jádigerler men nasıhat materıaldary qoıylǵan.

Mádenı nysannyń ashylý saltanatyna Túrkistan oblysy ákiminiń orynbasary Sáken Qalqamanov, memleket jáne qoǵam qaıratkeri Orazkúl Asanǵazyqyzy, Túrkistan oblystyq mádenıet basqarmasynyń basshysy Ázimhan Qoılybaev, Saıram aýdanynyń ákimi Ulasbek Sádibekov qatysyp, saıramdyqtardy jańa mýzeıdiń el ıgiligine berilýimen quttyqtady.

«Túrkistan oblysy elimizde demografııalyq damý turǵysynan kósh bastap tur. Memleketimizde dúnıege kelgen árbir besinshi bala bizdiń óńirde ómir esigin ashady. Osy rette oblysymyzda turyp jatqan altyn qursaqty analarymyzdyń eńbegin atap ótýge turarlyq. Kópbalaly analarymyzǵa árqashanda qoldaý bildirip, qýattap otyrýǵa, erekshe qurmet kórsetýge tıispiz»,- dedi Sáken Amangeldiuly.

Shara barysynda qonaqtar men jergilikti turǵyndar jańa mýzeı ekspozıtsııasymen tanysty.