Túrkistan oblysynda kópbalaly analar tegin medıtsınalyq kómek alyp jatyr

TÚRKІSTAN. QazAqparat - Túrkistan oblysyndaǵy emhanalarda kópbalaly analar tegin medıtsınalyq kómek alýda. Kóktem merekesi qarsańynda Túrkistan oblysy densaýlyq saqtaý basqarmasy basshysynyń bastamasymen óńirdegi barlyq emdeý mekemelerinde «Ashyq esik» kúni ótip jatyr, dep habarlaıdy QazAqparat tilshisi.

Dárigerler osylaısha kópbalaly analardy medıtsınalyq tekserýden ótip, sanalýan medıtsınalyq saraptamalar jasaýǵa shaqyrady. Kez kelgen aýrýdyń aldyn alý úshin skrınıng jasatý kerektigin eskertedi. Osy maqsatta uıymdastyrylǵan «Ashyq esik» kúni Saryaǵash, Arys aýdandyq ortalyq aýrýhanalarynyń emhana bóliminde ótti.

Bul shara búgin Túrkistan qalalyq emhanasynda jalǵasyn tapty. Emdeý ortalyqtarynda josparlanǵan ana men bala densaýlyǵyn jaqsartý jáne medıtsınalyq qyzmetke qoljetimdilikti arttyrý sharalary júıeli túrde qolǵa alynyp otyr. Al, medıtsınalyq jáne áleýmettik psıhologııalyq kómekti jalpy tájirıbeli dáriger, gınekolog, psıholog, nevropatolog, pedıatr, hırýrg, travmatolog-ortoped mamandar kórsetedi. Dıagnostıkalyq is-sharalar nátıjesinde tolyq tekserýden keıin analar tıisti em-domyn alyp, olarǵa saýyqtyrý jumystary jasalady. Bastysy, maman baqylaýyna alynady.



Sondaı-aq, Túrkistan oblysynyń barlyq aýdandyq emhanalarynda kópbalaly analar dáriger qabyldaýyna kezekten tys qabyldanyp, tegin medıtsınalyq kómektiń kepildendirilgen kólemi negizinde dári-dármekpen tolyq qamtamasyz etiledi. Árbir aýdandyq aýrýhanadan olarǵa 10 arnaıy palata ashylyp, jumys isteı bastady.