Túrkistan oblysynda kómirge suranys kúrt ósti
Basty sebep – oblysta jylyjaılardyń kóbeıýi. Sondyqtan, kásipkerlik baǵyttaǵy nysandardy kómirmen qamtamasyz etý máselesi kún tártibinde tur. Sonymen qatar, kúnniń kúrt sýytýy da kómirge degen suranysty joǵarylatqan.
Jalpy, óńirde qatty otynnyń qajettiligi 900 myń tonnadan asady. Búginde onyń 90%-y tasymaldanǵan. Buǵan qosymsha, taǵy 200 vagon kómir jetkizilmek.
Oblys turǵyndaryn kómir otynymen qamtamasyz etý máseleleri Túrkistan oblysynyń ákimi Darhan Satybaldynyń tóraǵalyǵymen ótken jıynda talqylandy. Túrkistan oblysy energetıka jáne turǵyn úı-kommýnaldyq sharýashylyǵy basqarmasynyń basshysy Sáken Dalıevtiń baıandaýynsha, kommýnaldyq-turmystyq salaǵa bir jylda 250 myń tonna kómir qajet. Turǵyndardyń qajettiligi 650 myń tonnadan asady. Onyń ishinde, Túrkistan qalasyna 690 tonna, Arys qalasyna 510, Saryaǵash aýdanyna 1500, Tólebı aýdanyna 800, Sozaq aýdanyna 1700 tonna kerek. Oblys kóleminde 26 temir jol tuıyǵy bar. Basqarma basshysynyń aıtýynsha, halyq arasynda dúrbeleń týmas úshin, kómir ótkizetin oryndardyń ókilderi turǵyndarǵa tıisti aqparat berýi qajet.
«Turǵyndar qajetti kómirmen tolyq qamtamasyz etilýi tıis. Máseleni kúndelikti baqylaýda ustaý kerek. Suranystyń artýy da aldyn ala boljanýy qajet. Monıtorıng jasap, naqty aqparattardy jınaqtap, aldyn alýdy júıeli jolǵa qoıý kerek», - dedi oblys ákimi.
Turǵyndardy kómirmen qamtamasyz etýge baılanysty Indýstrııa jáne ınfraqurylymdyq damý mınıstrligi, «QTJ», ken oryndary basshylarymen jedel shtab qurylǵan. Tıisti mınıstrlikterge vagon sanyn ulǵaıtyp, kómir kólemin arttyrýǵa qatysty hat joldanǵan. Kómir sapasy ákimdik usynysymen táýelsiz saparshylardyń tekserýinde. Jylytý maýsymynyń shtattyq rejımde ótýi baqylaýǵa alynǵan.