Túrkistan oblysynda kómir tapshylyǵy joq – Arman Jetpisbaı
Áleýmettik jelide Túrkistan oblysyndaǵy aýdan-qalalarda kómir tapshylyǵy týyndaǵany týraly kóptegen jazbalar jarııalanyp jatyr.
Tipti, Otyrar, Shardara aýdandarynda kómirdiń tapshylyǵy týyndap jatqany jaıly vıdeolar tarady.
Al, búgin Túrkistan óńirlik komýnıkatsııalar qyzmetinde ótken brıfıngte oblys ákiminiń birinshi orynbasary Arman Jetpisbaı bul málimetti teriske shyǵaryp, óńirde kómir tapshylyǵy joq ekenin aıtty.
«Túrkistan óńirinde 26 kómir qabyldaıtyn temir jol tuıyǵy, 21 kómir tasymaldaıtyn mekeme bar. Oblys ákiminiń tapsyrmasyna sáıkes aýdan, qala ákimdikteri óz eldi mekenderinde ornalasqan temir jol tuıyǵy nemese baza, qoımalarǵa halyqty turaqty kómirmen qamtamasyz etý úshin kómir jetkizýshi, satýshylarmen tıisti jumys atqaryp jatyr. Reıd turaqty túrde júrgizilýde. QR Indýstrııa jáne ınfraqurylymdyq damý mınıstrligi, QTJ jáne ken oryndarymen birge kelissóz ótkizip, Túrkistan oblysyna kómir jetkizýdi ulǵaıtý jóninde kelisimge keldik. Kómirdi jetkizý 60-70 vagonnan birneshe baǵyt boıynsha júzege asady, negizgi bóligi jylyjaılarǵa - Saryaǵash aýdanyna jóneltilip jatyr. Kómir tapshylyǵy joq», - dedi ol.
Spıkerdiń aıtýynsha qazirgi tańda Túrkistan oblysy boıynsha 1 618 tonna kómir qory bar.
Onyń ishinde, Saryaǵashta – 1 311, Sozaqta – 100, Arysta 207 tonna kómir jınaqtalǵan.
Keshe 49 vagon kómir túsken. Al, búgin 102 vagon túsirilip jatyr. Sondaı-aq, 349 vagon kómir jolda kele jatyr.
Sonymen qatar oblys ákiminiń birinshi orynbasary óz sózinde Qazaqstan Respýblıkasynyń Premer-Mınıstri Álıhan Smaıylov ishki naryqty ásirese shalǵaıdaǵy eldi mekenderdi kómirmen qamtamasyz etý máseleleri boıynsha keńes ótkizgenin atap ótti.
«Óńirlik operatorlardyń kómirdi jetkizý jónindegi qyzmetin taldaýdy jáne deldaldarsyz áleýmettik obektilermen halyqqa ken oryndarynan tikeleı kómirdi jetkizýdiń jańa tetigin pysyqtaýdy tapsyrdy. Bul baǵytta jumys júredi. Jylytý maýsymynyń barysy jáne kómir máselesi turaqty baqylaýda. Keıbir aımaqtarda anyqtalǵan kemshilikter boıynsha jumys júrgizilip, kómir qoryn jetkizý jáne jylytý maýsymy turaqty baqylaýǵa alynǵan», – dedi A. Jetpisbaı.
Aıta keteıik, budan aldyn kómir tapshylyǵynan Túrkistan oblysynda jylyjaıdaǵy ónimder úsip ketkenin jazǵan bolatynbyz.