Túrkistan oblysynda kómekke muqtaj oqýshylar tizimi jasaqtalyp jatyr

TÚRKІSTAN. QazAqparat – Túrkistan oblysynda «Mektepke jol» aktsııasy bastaldy, dep habarlaıdy QazAqparat tilshisi.

«Ótken jyly «Mektepke jol» aktsııasynyń negizinde 4 myńnan asa balaǵa kómek kórsetilgen bolatyn. Búginde kómekke muqtaj balalardyń tizimi daıyndalyp jatyr», - dedi Túrkistan oblystyq adamı áleýetti damytý basqarmasy basshysynyń orynbasary Nurjan Nurlybaev.

Aıtýynsha, árbir eldi mekende, qala mańyndaǵy saıajaılarda, bólimderde, fermalarda «táýekel tobyndaǵy» balalardy anyqtaý úshin reıd júrgizilmek. Reıdterdiń qorytyndysy boıynsha tizimder jasalady. Bul tizim bilim berý organdary men demeýshilerge beriledi.

Oblystyq adamı áleýetti damytý basqarmasynyń bas mamany Ǵalııa Ámiráliqyzynyń aıtýynsha, tizimder ata-analardyń kelisimimen jasalady jáne oǵan belsendi qatysýǵa múmkindik bar.

Sonymen qatar, aktsııa aıasynda senim telefondary men qoǵamdyq qabyldaýlardyń úzilissiz jumysy uıymdastyrylady.

Aıta keteıik, «Mektepke jol - shekarasyz jaqsylyq» uranymen ótkeli otyrǵan aktsııa 1 tamyz ben 30 qyrkúıek aralyǵynda júzege asady. Muqtaj jandarǵa kómektesýdi, sondaı-aq demeýshilik kómek kórsetýdi qalaıtyn kez kelgen turǵyn Túrkistan oblysy adamı áleýetti damytý basqarmasynyń baılanys ortalyǵyna ([phone]) habarlasa alady.