Túrkistan oblysynda kóktemgi áskerge shaqyrý naýqany bastaldy
Óńirlik kommýnıkatsııalar qyzmetiniń málimetine sensek, 1 naýryzdan bastap 18 jasqa tolǵan azamattar turǵylyqty jeri boıynsha jergilikti áskerı basqarý organdarynda medıtsınalyq komıssııadan, testileýden jáne áńgimelesýden ótip jatyr.
Osy jyldyń kókteminde Túrkistan oblysynan 2000-nan astam er azamatty shaqyrý josparlanǵan.
Kúni keshe ǵana alǵashqy 25 er azamat konstıtýtsııalyq mindetin oryndaý úshin áskerge attandy. Olar shaqyrý komıssııasynyń otyrysynan ótti.
Túrkistan oblysy qorǵanys departamentiniń bastyǵy, polkovnık Nurmahanbet Dıýsebaevtyń aıtýynsha, oblysymyzdyń jastary áskerı qyzmetke belsendi qyzyǵýshylyq tanytyp otyr.
Sonyń esebinen báseke týyndaıdy jáne tek úzdikter ǵana áskerge attanbaq.
«Aldaǵy ýaqytta áskerge oblysymyzdan 2000-ǵa jýyq azamatty attandyramyz. Bul az san emes, biraq óńirimizdiń er-jigitteri áskerge qulshynysy jaǵynan árqashan aldyńǵy shepte turady, sol sebepten biz kóktemgi josparymyzdy ýaqytyly, ári sapaly oryndaıtynymyzǵa berik senemin», - dedi ol.
Áskerge shaqyrylýshylar men laýazymdy tulǵalar arasynda koronavırýstyq ınfektsııanyń taralmaýy úshin jınaq pýnktilerde medıtsınalyq beketter ornalastyryldy.
Oblystyq medıtsınalyq komıssııalardyń quramyna ınfektsıonıst dárigerler engizildi.
Jas býyn áskerı bólimderge keter aldynda mindetti túrde PTR-zertteý ádisimen COVID-19-ǵa zerthanalyq zertteýden ótedi.
Al bólimge kelgennen keıin jastar eki aptalyq karantınge oqshaýlanady.
Karantın kezinde medıtsınalyq tekserý jáne áleýmettik-psıhologııalyq zertteý júrgiziledi.
Keıinge qaldyrýǵa quqyǵy bar áskerge shaqyrylýshylar sanatyn keńeıtý de - mańyzdy jańalyq.
Endi keıinge qaldyrý pedagogterdiń búkil jumys kezeńine, sondaı-aq quqyq qorǵaý organdarynyń bilim mekemelerinde oqýdan ótip jatqan adamdarǵa beriledi.