Túrkistan oblysynda kókpar uıymdastyrýshylarǵa tosqaýyl bolmaı tur

TÚRKІSTAN. QazAqparat - Túrkistan oblysynda kókpar uıymdastyrýshylarǵa tosqaýyl bolmaı tur. Saryaǵash aýdanynda mobıldi top pen polıtsııa qyzmetkerleri kezekti profılaktıkalyq jumys kezinde kókpar ótip jatqanyn anyqtaǵan, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, Saryaǵash aýdanyndaǵy aýyldardyń birinde qazyǵurttyq turǵynnyń kókpar ótkizip jatqany belgili bolǵan.

Ulttyq oıynǵa 100-ge jýyq adam jınalǵan.

Sonymen qatar karantın shekteýlerine qaramastan Saryaǵash qalasynda kompıýterlik oıyn klýby jumys istep turǵan.

Oıynhana ıesi de anyqtalyp, oǵan qatysty ákimshilik aıyppul salynǵan.

«Atalǵan jaıttarǵa baılanysty kókpar oıynyn uıymdastyrýshysyna jáne oıynhana ıesi men oıynhana ákimgerine karantın talaptaryn oryndamaǵany úshin is-qujattar rásimdelgen. Karantın rejımin jáne shekteý sharalaryn saqtamaǵan azamattarǵa qatysty qujattar Saryaǵash aýdandyq sanıtarııalyq-epıdemıologııalyq baqylaý basqarmasyna joldanǵan» delingen habarlamada.