Túrkistan oblysynda kıberqylmysqa qarsy kúres qyzmetkerleri 31 alaıaqty ustady

ASTANA. QazAqparat - Túrkistan oblysynda kıberqylmysqa qarsy kúres qyzmetkerleri 31 alaıaqty ustady, – dep habarlaıdy Polisia.kz.

QR ІІM «CyberPol» pılottyq jobasyn iske qosqan bolatyn. Bul joba tsıfrlyq tehnologııalar arqyly jasalatyn zańsyzdyqpen kúresý, memlekettik organdarmen ózara is-qımyl jasaý, el turǵyndarynyń quqyqtyq saýattylyǵyn arttyrýdy kózdeıdi. Osy baǵytta Túrkistan oblysy PD krımınaldyq polıtsııa basqarmasynda kıberqylmys pen ınternet-alaıaqtyqtyń aldyn alyp, anyqtaýda 6 jedel ýákil, 3 tergeýshiden qurylǵan «Kıberqylmysqa qarsy kúres» turaqty toby qarqyndy jumys júrgizip jatyr.

Departament bastyǵynyń tapsyrmasymen qurylǵan top ınternet-alaıaqtyq qylmysymen aınalysqan jalpy 31 turǵyndy ustap, olardyń 56 derek ınternet-alaıaqtyq qylmysyna qatysy baryn dáleldegen. Bul qylmystyq ister boıynsha jınaqtalǵan is qujattar sotqa joldanǵan.Máselen, bul toptyń jedel ýákilderi oblystyń birneshe turǵynyn aldap, olardyń atynan onlaın nesıe alǵan jas jigitti ustady.

Naqtyraq aıtsaq, Túrkistan qalalyq polıtsııa basqarmasyna jergilikti turǵyn aryzdandy. Ol kóligine jolaýshy bolyp otyrǵan jas jigit áńgimege tartyp, senimine kirip, telefonyn surap alyp, ondaǵy bank qosymshasyn paıdalanyp, onyń atyna 1,6 mln teńge nesıe rásimdep alǵanyn jetkizdi. Aqparat alysymen arnaıy qurylǵan top qyzmetkerleri kúdiktiniń jeke basyn anyqtady. Kúdikti — Saryaǵash aýdanynyń turǵyny, jumyssyz jas jigit. Ol 6 birdeı júrgizýshini aldap, olarǵa jalpy 6 mln teńgege jýyq materıaldyq shyǵyn keltirgeni belgili boldy.Nesıege maquldaý alǵan alaıaq, tanysy aqsha salyp jibergenin aıtyp, júrgizýshiniń telefony arqyly arnaıy termınaldardan qarajatty sheship alyp otyrǵan. Qazirgi tańda kúdikti qamaýda, oǵan qatysty materıaldar aıyptaý aktisimen sotqa joldandy. Aıta ketsek, kıberqylmysqa qarsy kúres qyzmetkerleri oryn alǵan ınternet-alaıaqtyq qylmystaryn saralap, jergilikti halyqtyń qarjylyq saýattylyǵyn arttyrý maqsatynda júıeli profılaktıkalyq is-sharalardy únemi uıymdastyryp keledi. Mysaly, bul toppen 18-20 sáýir kúnderi aralyǵynda aqparattyq tehnologııalardy paıdalana otyryp jasalatyn quqyq buzýshylyqtarǵa, onyń ishinde ınternet-alaıaqtyqqa qarsy kúres tıimdiligin arttyrýǵa baǵyttalǵan «Anti-Fraud» jedel-profılaktıkalyq is-sharasy ótip jatyr.