Túrkistan oblysynda Keles ormanshylyǵynan shyqqan órt sóndirildi
10:05, 13 Shilde 2023
TÚRKІSTAN. QazAqparat - 2023 jylǵy 13 shilde kúni saǵat 01:30-da Túrkistan oblysy Tótenshe jaǵdaılar departamentiniń Daǵdarys jaǵdaılary basqarmasyna «Saıram-Ógem» memlekettik ulttyq tabıǵı parkiniń Ógem fılıalyna qarasty Keles ormanshylyǵynda órt shyqqany týraly habarlama tústi.
Bul týraly QazAqparat Túrkistan oblystyq Tótenshe jaǵdaılar departamentiniń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, tez arada jedel shtab quryldy, onyń quramyna orman sharýashylyǵy, jergilikti atqarýshy organdar men Túrkistan oblysy Tótenshe jaǵdaılar departamentiniń qyzmetkerleri kirdi.
Jedel qabyldanǵan sharalar men jumyldyrylǵan kúshter men quraldardyń arqasynda qurǵaq shóp pen butalar órti saǵat 05.50-de oqshaýlanyp, saǵat 08.00-de sóndirildi. Aldyn ala aýdany 2 gektardy quraıdy. Qaıtys bolǵandar men zardap shekkender joq.
Órtti sóndirýge orman sharýashylyǵynan 48 adam men 8 birlik tehnıka, Túrkistan oblysy TJD 45 adam men 5 tehnıka jumyldyryldy.