Túrkistan oblysynda kásipkerlik nysandardyń jumys ýaqyty uzartyldy
Bas sanıtar dárigerdiń aıtýynsha, óńirdegi banket zaldary men meıramhanalar endi 50 paıyzdan aspaıtyn (50 adamǵa deıin) syıymdylyqpen saǵat 7:00-den 2:00-ge deıin jumys isteıdi. Al, bılıard, kompıýterlik klýbtar men boýlıng ortalyqtary 12:00-den 24:00-ge deıin qyzmet kórsete alady. Basseın, sport keshenderi jáne fıtnes ortalyqtardyń jumys isteýine de ruqsat etildi. Mundaı jumys rejımine «Ashyq» qosymshasy júıesine engizilgen kásipkerlik nysandary ǵana ótedi.
«Vırýstyń taralý qaýpin azaıtý men karantındik sharalar kezinde kásipkerlerdiń qyzmetin jalǵastyrýǵa múmkindik beretin «Ashyq» jobasy sáýirdiń 26-nan bastap, elimizdegi barlyq óńirlerde júzege asyryla bastady. Joba - kásipkerlik nysandardyń jumysyn jandandyrýǵa múmkindik bermek», – dedi N.Nyshanov.
Óz kezeginde oblystyq kásipkerler palatasynyń dırektory Tımýr Naqypbekov jobanyń qalaı júzege asyp jatqanyn atap ótti.
«Kez-kelgen azamat «Ashyq« mobıldi qosymshasyn «App Store» jáne «Play Market»-ten telefonyna júktep alýy kerek. Qosymshaǵa JSN nómiri arqyly qosylyp, ózi barǵan mekemedegi arnaıy QR-kodty skanerleıdi. Nátıjesinde onyń jasyl, kók, sary nemese qyzyl túster arqyly klıenttiń mártebesi kórsetiledi. Qyzyl tús – qoǵamdyq orynda bolýyn shektep, oqshaýlaýdyń qatań rejımin saqtaýdy, sary – patsıent úıde oqshaýlaný rejımin saqtaı otyryp, úıinen 500 metr jerden aspaıtyn azyq-túlik jáne apparattyq dúkenderge, dárihanalarǵa barýǵa ruqsat etiletinin bildiredi. Al, kók – PTR test mindetti bolatyn jerlerden basqa oryndarda shekteýler bolmaıdy. Jasyl – eshqandaı shekteýler joq ekenin bildiredi jáne bul paıdalanýshy derekqorda «Covid-19» teris nátıjesi bar PTR-testileýden ótken adam retinde kórsetiledi», – dedi T.Naqypbekov.
Kásipkerler QR kod alý úshin ótinimdi www.infokazakhstan.kz saıty arqyly beredi. Kınoteatrlar, qoǵamdyq tamaqtaný oryndary, qosymsha bilim berý uıymdary ótinimderdi salalyq qaýymdastyq arqyly beredi. QR-kod tek bıznes sýbektilerine beriledi. Sondaı-aq, brıfıng barysynda oblystyq Qoǵamdyq densaýlyq basqarmasynyń basshysy Marat Pashımov óńirdegi ekpe egý jumystary jóninde baıandady. Onyń sózinshe, vaktsına saldyrý boıynsha Túrkistan oblysy kósh bastap tur.
«Oblysqa aqpan aıynan bastap «Spýtnık V» vaktsınasynyń 141 700 dozasy jetkizilgen. Búgingi kúnge deıin – 140 565 adam 1-shi komponentpen vaktsına qabyldady. Al, otandyq «QazVac» vaktsınatsııasy myńǵa jýyq adamǵa egilgen. Aldaǵy ýaqytta «Spýtnık-V» 185 myń doza jáne «QazVac» otandyq vaktsınasynan 752 myń doza qamtamasyz etý josparlanyp otyr», – dedi M.Pashımov.