Túrkistan oblysynda kásipkerlerdi ınvestıtsııalyq qoldaýǵa baǵyttalǵan 8 joba irikteldi

TÚRKІSTAN. QazAqparat - Elimizde alǵash ret Túrkistan oblysynda bastaý alǵan «Kásipkerlik qyrandary» jobasy jalǵasyn tapty. Oblys ákimdigi men kásipkerler palatasy birlese júzege asyrǵan erekshe formattaǵy joba kásipkerlerdi mentorlyq, ınvestıtsııalyq, ınfraqurylymdyq qoldaýǵa baǵyttalǵan, dep habarlaıdy QazAqparat tilshisi.

Atalǵan joba sondaı-aq, otandyq ınvestorlardyń kómegimen startaperdi, «Bastaý bıznes» túlekterin kásipkerlikke baýlıdy. Oblys ákimi Ómirzaq Shókeevtiń qatysýymen «Farab» kitaphanasynda ótken televızııalyq jobanyń túsiriliminde túrkistandyq kásipkerler belgili bıznes metrleriniń aldynda bıznes jobasyn qorǵap shyqty. Telejoba moderatory - Túrkistan oblysy kásipkerler palatasy dırektory Tımýr Naqypbekov boldy.

«Bizde «zııatkerlik resýrs» bar. Bilimi men aqyl-zerde, parasat dárejesi básekege túse alatyn erýdıt adamdar jetedi. Kreatıvti jobalardy memlekettik baǵdarlamalar arqyly qoldaýǵa bolady. Shaǵyn jáne orta bıznesti damytýǵa jáne qoldaýǵa elemizde erekshe kóńil bólingen. «Janyp turǵan» jas bıznesmenderge úlken jol ashatyn joba jalǵasyn tabady», – dedi telejoba túsirilimine qatysqan Ómirzaq Shókeev.

Óńirlik keńestiń beldi músheleri joba aıasynda mentor retinde qoldaý bildirip, mol tabys tabýdyń qyr-syrymen bólisti. «Kásipkerlik qyrandary» televızııalyq tok-shoý baǵdarlamasyna qatysyp, jastardy jigerlendirgen aımaq basshysy kásipkerge qoldaý kórsetken ınvestorlarǵa alǵysyn aıtty.

Aıta keteıik, jobanyń birinshi maýsymynda ınvestıtsııaǵa qol jetkizgen kásipkerlerdiń jobalary júzege asyp, kásipteri damýda. Ekinshi maýsymǵa qatysýǵa palataǵa 170-ke jýyq ótinim kelip tústi. Onyń ishinde jalpy quny 43 mln teńgeniń 8 jobasy iriktelgen. Qatal saraptaýdan soń fınalǵa shyqqan joba avtorlary ınvestıtsııa úshin kúreste ózderiniń biregeı bıznes - ıdeıalaryn ortaǵa saldy.

Investıtsııa jáne mentorlar úshin kúreste úmitkerler tsıfrlyq aýdıo kitaptardy qazaq tilinde usynatyn mobıldi qosymsha, arbolıt blogyn shyǵarý, bal ara sharýashylyǵy (omarta), balalar oıyn-saýyq ortalyǵy, medıa salasynda keshendi qyzmet kórsetetin mektep ashý, epoksıd shaıyr ónim shyǵarý tsehy jáne qurylys qolǵabyn óndirý sekildi jobalardy tanystyrdy. Nátıjesinde ınvestorlar men qatysýshylar birlesken jobalardy iske asyrý boıynsha kelisimge kelgen.