Túrkistan oblysynda karantın talaptary taǵy da jeńildedi

TÚRKІSTAN. QazAqparat - Túrkistan oblysynda epıdemıologııalyq jaǵdaıdyń turaqty bolýyna baılanysty karantındik shekteý sharalary kezeń-kezeńimen jeńildetilip jatyr. Bul týraly oblystyń bas memlekettik sanıtar dárigeri Nurbek Nyshanov baspasóz máslıhatynda málimdedi, dep habarlaıdy QazAqparat tilshisi.

Nurbek Nyshanovtyń aıtýynsha, óńirde sońǵy eki aptada koronavırýs ınfektsııasyn juqyrý kórsetkishi 16,3 %, pnevmonııaǵa shaldyǵý kórsetkishi 47,5 % tómendegen.

«27 qyrkúıekten bastap kúshine engen qaýlyda «qaýipsiz» mártebesi bar qyzmetkerler men kelýshileri bolǵan kezde tolymdylyǵyn 50%-dan asyrmaı 100 kelýshiden kóp emes jaǵdaıda otbasylyq is-sharalar men toılardy ótkizýge, konferentsııalar men forýmdardy uıymdastyrýǵa ruqsat berildi. «Ashyq» jobasyna qatyspaıtyn nysandarda joǵaryda atalǵan barlyq sharalardyń ótýine tyıym salynady. Sonymen qatar, buǵan deıin jeksenbi kúni júrýine tyıym salynǵan qoǵamdyq kólik senbi, jeksenbi kúnderi qyzmet kórsetedi»,-dedi Nurbek Sadyqbekuly.

Jańa qaýlyda sondaı-aq, tolymdylyǵy 70%-dan aspaıtyn 500 kelýshiden artyq emes túrde «qaýipsiz» mártebedegi azamattardyń qatysýymen kórme ótkizýge bolady delingen.

Ashyq aýada 1000 adamnan artyq emes jaǵdaıda marafondar, sporttyq is-sharalar kelýshilerdiń tolymdylyǵy 80%-dan asyrylmaı ótkizilýi tıis.

Aıta keteıik, kúni búginge deıin aımaqqa koronavırýsqa qarsy vaktsınanyń I komponentiniń 908 630 dozasy jetkizilgen.

Ekpe egý boıynsha oblys halqynyń 95% - vaktsınanyń I komponentin, 76,8% - II komponentin saldyrǵan.