Túrkistan oblysynda karerler jappaı tekserilip jatyr
Túrkistan oblysynda jer qoınaýyn zańsyz paıdalanýshylarǵa qarsy kúres kúsheıtildi.
Oblys aýmaǵynda 100-den astam karerlerdiń jumystary jappaı tekserilip jatyr.
Reıd ótkizilip, zańsyzdyqqa jol bergen kásip ıelerine aıyppul salynýda.
Jyl basynan beri kelisimsharttyq mindettemelerin tolyq oryndamaǵan jáne sý qorǵaý beldeýinde ornalasqan 11 jer qoınaýyn paıdalanýshynyń kelisimsharttary merziminen buryn toqtatyldy.
Túrkistan oblysynyń ákimdiginde ótken májiliste ózenderdiń arnasyn buzyp, taý-tasty, tarıhı oryndardy qoparyp, zańsyz qum, tas jáne ózge de paıdaly qazba alyp jatqan kásipkerlerdiń áreketi ótkir synaldy.
Oblystyq Kásipkerlik jáne ónerkásip basqarmasynyń basshysy Nurjigit Myrzahmetovtyń baıandaýynsha, Saıram aýdanynyń aýmaǵyndaǵy 3 jer qoınaýyn paıdalanýshy Aqsý ózeniniń sý qorǵaý beldeýinde ornalasýyna baılanysty kelisimsharttarynyń qoldanysy merziminen buryn toqtatylǵan.
Sondaı-aq «Syrdarııa-Túrkistan» memlekettik óńirlik tabıǵı parkiniń erekshe qorǵalatyn aýmaqtaryna kirýine baılanysty Arys qalasynyń aýmaǵynda ornalasqan úsh jer qoınaýyn paıdalanýshymen aradaǵy kelisim shart buzylǵan.
Ordabasy, Saýran, Tólebı jáne Túlkibas, Shardara aýdandarynda ornalasqan ken oryndarynyń sý qorǵaýy beldeýine ornalasýyna jáne kelisimshart mindettemelerin oryndamaýyna baılanysty kelisimsharttyń qoldanysy merziminen buryn toqtatylǵan.
Endigi jerde tabıǵatqa zalal keltirgen mekemeler qazǵan jerdi tegisteý kerek.
«Halyqpen kezdesý kezinde de osy másele jıi kóteriledi. Turǵyndarymyz zańsyz karerlerden zardap shegýde. Karer qazǵannan ózender men bulaqtar tartylyp jatyr. Onyń ústine aýyr kólikter mıllıardaǵan qarajatqa salynyp jatqan tasjoldardyń tas - talqanyn shyǵaryp jatyr. Olardy qorǵaǵandardyń ózin qylmysker dep sanaımyn», - dedi Túrkistan oblysynyń ákimi Darhan Satybaldy.