Túrkistan oblysynda qańtarda 35 myńǵa jýyq PTR - test jasalǵan

TÚRKІSTAN. QazAqparat - Koronavırýs ınfektsııasynyń taralýyn boldyrmaý jáne naýqastardy emdeýge baılanysty «Áleýmettik medıtsınalyq saqtandyrý qory» KEAQ Túrkistan oblysy boıynsha fılıaly men óńirdegi 29 statsıonarlyq, 44 ambýlatorııalyq qyzmet kórsetetin medıtsınalyq uıymdary arasynda PTR-test júrgizýge kelisimshart jasaldy. Bıylǵy jyldyń qańtar aıynda 35 myńǵa jýyq PTR-test boıynsha qyzmet kórsetilgen. Bul týraly qordyń Túrkistan oblysy boıynsha fılıalynyń medıtsınalyq qyzmet sapasyn monıtorıngileý bóliminiń basshysy Ǵalıma Tórehanova málim etti, dep habarlaıdy QazAqparat.

Ótken jyly óńirdegi Ulttyq saraptama ortalyǵynda, oblystyq fızıopýlmonologııalyq ortalyǵynda, dermato-venerologııalyq dıspanserinde, Túrkistan qalalyq emhanasynda PTR zertteý boıynsha zerthanalar ashylyp, jumys istegen.

«Búginde Ordabasy, Jetisaı, Saryaǵash, Sozaq, Saıram,Tólebı, Jetisaı aýdandyq aýrýhanalarynda PTR boıynsha zerthanalar bar. Alaıda medıtsınalyq uıymdarda PTR-testke qatysty júrgizilip jatqan sharalar barysynda birqatar kemshilikter anyqtalǵan. Medıtsına qyzmetkerleri aqparattyq júıege naýqastyń málimetin engizý barysynda birqatar olqylyqtarǵa jol bergen. Jalpy, anyqtalǵan kemshilikterge Qor fılıaly tarapynan 108 mln teńge aıyppul salyndy. Medıtsınalyq uıymdardyń PTR-testke qatysty kemshilikteri boıynsha Qor fılıalynyń sarapshylary taldaý jasap, tıisti eskertýlerdi jasady», - dedi qordyń bólim basshysy Ǵalıma Tórehanova.