Túrkistan oblysynda «Qamqorlyq» baǵdarlamasy aıasynda 4 otbasyǵa baspana berildi

TÚRKІSTAN.QazAqparat – Túrkistan oblysynyń ákimi Ómirzaq Shókeev eseptik jıynda áleýmettik qoldaýda ádilettilikti qamtamasyz etý jáne azamattardy eńbekke yntalandyrý maqsatynda ataýly áleýmettik kómek kórsetý júıesi jetildirilgenin jetkizdi, dep habarlaıdy QazAqparat tilshisi.

Aımaq basshysynyń aıtýynsha, óńirde árbir otbasynyń tabysyn esepteý kezinde kóptegen áleýmettik tólemder alynyp tastalǵan. Al, 1 jastan 18 jasqa deıingi balalarǵa kepildendirilgen áleýmettik paket engizilgen. Sondaı-aq, memlekettik baǵdarlamalardan bólek «Nur Otan» partııasynyń bastamasymen ómirlik qıyn jaǵdaıǵa tap bolǵan otbasylardy kedeılik deńgeıinen shyǵýǵa yntalandyratyn «Qamqorlyq» baǵdarlamasy ázirlengen.

«Baǵdarlama aıasynda tıimdi jumyspen qamtýǵa jáne kásipkerlik qyzmetti damytýǵa erekshe nazar aýdarylatyn bolady. Otbasylardy turaqty tabys kózimen qamtamasyz etý nátıjesinde olardy ómirlik qıyn jaǵdaıdan kezeń-kezeńmen shyǵarý kózdelýde. Atalǵan baǵdarlama aıasynda júrgizilgen jumystar barysynda jaǵdaıy tym tómen ári krızıstik jáne qanaǵattanarlyqsyz deńgeıde ómir súrip jatqan 1643 otbasy anyqtalyp, olardyń árqaısysyna materıaldyq kómek pen qajetti keńes beretin arnaıy kýratorlar taǵaıyndalǵan»,- dedi Ómirzaq Shókeev.

Oblys ákiminiń sózinshe, qazirdiń ózinde baǵdarlama bastalǵaly beri ómirlik qıyn jaǵdaıǵa tap bolǵan 900-dan astam otbasyǵa 45 mln teńgeniń demeýshilik kómegi kórsetilgen. Al, 4 otbasyǵa kásipkerler tarapynan úı satyp alynǵan. Budan bólek, «Qamqorlyq» baǵdarlamasy arqyly januıa múshelerin jumysqa turǵyzý, oqytý jáne ózge de máseleleri aýdan, qala ákimderiniń baqylaýynda bolady.