Túrkistan oblysynda HQO-lar jumysyn qaıta bastady
Eldegi vırýstyń taralý qaýipi áli de saqtalýyna baılanysty halyqqa qyzmet kórsetý ortalyqtarynyń jumys tártibin ózgertý týraly sheshim qabyldandy. Ózgerister HQO-da kórsetiletin memlekettik qyzmet túrlerin jáne olardy usyný formatyn da qamtıdy.
Endi azamattar HQO-dan tek «qaǵaz júzindegi», elektrondy formatta qoljetimsiz qyzmetter men egov.kz portalynda onlaın túrde rásimdelgen qyzmetterdiń nátıjelerin ǵana alady. HQO-ǵa barý úshin 1414 baılanys ortalyǵy nemese nemese egov.kz portalyndaǵy arnaıy servıs arqyly kezek ýaqytyn aldyna ala brondaý qajet.
Aldyn ala jazylýsyz HQO-larda eshqandaı qyzmet kórsetilmeıdi. Degenmen 3 sanattaǵy azamattar, ıaǵnı zeınetkerler, kóp balaly otbasylar jáne múgedektigi bar azamattar elektrondyq qyzmetterdi HQO-dan ala alady. Ár front-ofıste olar úshin jeńildik terezesi uıymdastyrylǵan. Sondaı-aq olar da HQO-ǵa baratyn ýaqytyn aldyn ala brondaýy kerek.
Azamattar elektrondy formatqa aýdarylǵan jáne egov.kz portalynda qoljetimdi barlyq memlekettik qyzmettiń 80%-dan astamyn burynǵydaı HQO ǵımarattarynda emes, ákimdikter janyndaǵy keńselerde, oqý oryndarynda, medıtsınalyq uıymdarda jáne basqa jerlerdegi ózine-ózi qyzmet kórsetý sektorlarynda ala alady.
Aıta keteıik, aıtylǵan jańashyldyqtar tek qalalyq halyqqa qyzmet kórsetý ortalyqtarynyń jumysyna ǵana qatysty ekenin aıtty. Al aýdandyq mańyzy bar qalalarda, sondaı-aq aýdan ortalyqtarynda ornalasqan bólimder qalaǵa qaraǵanda kelýshiler sanynyń aıtarlyqtaı az bolýyna baılanysty ózgerissiz, burynǵy rejımje jumys isteıdi.
«Sonymen qatar, qyzmet alýshylar elektrondy qyzmetterdi egov.kz portalynda, eGov mobile, EgovKzBot mobıldi qosymshalarynyń, Facebook jáne Vkontakte áleýmettik jelilerinde chat-bottar arqyly ala alady. Óńir turǵyndaryna yńǵaıly bolý úshin óz-ózine qyzmet kórsetý buryshtarynyń sanyn kóbeıtemiz»,- deıdi «Azamattarǵa arnalǵan úkimet» memlekettik korporatsııasy» KE AQ Túrkistan oblysy boıynsha fılıal dırektory Erjan Jeńisbekov.