Túrkistan oblysynda etnosaralyq tatýlyqty nyǵaıtý máseleleri talqylandy

TÚRKІSTAN. QazAqparat - Túrkistanda «Etnosaralyq qaqtyǵystardyń aldyn alý jolynda onyń mehanızmi men algorıtmin qalyptastyrý» taqyrybynda semınar ótti. Nur Otan partııasynyń saıası menedjment mektebi men Túrkistan oblysy ákimdigi uıymdastyrǵan semınarda etnosaralyq tatýlyqty saqtaý máseleleri talqylandy, dep habarlaıdy QazAqparat tilshisi.

Jıynǵa QR Ulttyq qaýipsizdik komıteti men quqyq qorǵaý organdarynyń ókilderi, jergilikti atqarýshy bıliktiń ıdeologııa salasyna jaýapty bólim basshylary, ǵalymdar, sarapshylar, QHA ókilderi qatysty. Keleli basqosýda sondaı-aq, qoǵamdyq kelisimdi nyǵaıtý men daý-damaılardyń aldyn alý baǵytynda oılar aıtyldy. Atalǵan semınar oblys aýmaǵynda túrli saladaǵy quqyqtyq qatynastarda etnosaralyq qaqtyǵys jaǵdaılaryn týǵyzýy múmkin jaǵdaılardy jáne onyń aldyn alýǵa baǵyttalǵan is-sharalardy uıymdastyrý týraly oblys ákimdiginiń, oblys prokýratýrasy men UQQ Túrkistan oblysy boıynsha departamentiniń jáne oblystyq Polıtsııa departamentiniń birlesken josparyna sáıkes ótkizildi.

Semınardy Túrkistan oblystyq qoǵamdyq damý basqarmasynyń basshysy Ańsar Óserbaev júrgizip otyrdy. Ol Túrkistan oblysynda qoǵamdyq kelisimdi nyǵaıtý maqsatynda jumystar atqarylǵanyna, Túrkistan oblystyq Qazaqstan halqy Assambleıasynyń josparǵa saı mindetin oryndap jatqanyna toqtaldy.

QR Aqparat jáne qoǵamdyq damý mınıstrligine qarasty Qoldanbaly etnosaıası zertteýler ınstıtýtynyń dırektory Talǵat Qalıev etnosaralyq qaqtyǵystardyń aldyn alý baǵytyndaǵy jumystardy kúsheıtý asa mańyzdy mindet ekenin málimdedi. Bul rette atqarýshy organdar men quqyq qorǵaý salasynyń ókilderi bilimmen qarýlanýy tıis.

Jıynda tarıh ǵylymdarynyń doktory, professor Jambyl Artyqbaev «Qazaqstan: ultaralyq qarym-qatynastar tarıhy, qazirgi ýaqyttaǵy etnosaralyq qarama-qaıshylyqtar jáne etnomádenı yqpaldastyq máseleleri» taqyrybynda baıandama jasady.

«Búgingi semınar óte mańyzdy. Qazaqstan – ýnıtarly memleket. Degenmen memleketquraýshy qazaq ultynan bólek etnostar da ómir súredi. Biz mýltımádenıetti ortany qalyptastyrýymyz qajet. Adamdar bir-birimen sanasyp, tatý-tátti turýy tıis. Tatý el ǵana qaryshtap damı alady. Al endi ishinde ymyrasy joq, tatýlyǵy joq eldiń bolashaǵy da joq. Túrkistandaǵy jıynda osy máseleni arnaıy talqylaıyn dep otyrmyz. Árıne elde etnosaralyq oqıǵalar boldy. Bul kıkiljińder áleýmettik máselelerden, ýaqytynda sheshilmegen túıtkilder men ádiletsiz sheshimderdiń saldarynan týyndaıdy. Sondyqtan osy salaǵa jaýapty mamandar, basshylar árbir máseleni baqylap, ýaqytynda áreket etýleri kerek. Arnaıy algorıtm men jumys jospary, jaýapkershilik bolǵany jón», – dedi J.Artyqbaev.

Qoldanbaly etnosaıası ınstıtýtynyń áleýmettanýlyq zertteýler departamentiniń bas menedjeri Dýlat Óteǵalı «Qaqtyǵystardyń aldyn alý tetigi, onyń qoldanylýy jáne kemshilikteri. Qaqtyǵystarǵa den qoıý sharalarynyń algorıtmi» taqyrybynda oı qozǵady. Qatysýshylar spıkerlerge suraqtaryn qoıyp, pikir almasty.

Semınar sońynda qatysýshylarǵa sertıfıkattar tapsyryldy.