Túrkistan oblysynda erikti ustazdar 91 myńnan astam betperde tigip taratty

TÚRKІSTAN. QazAqparat – Túrkistan oblysynda ustazdar qoldan 91 myńnan asa medıtsınalyq betperde tigip shyqty. Medıtsınalyq maskalar óńirdegi aýyldar men qalalardyń turǵyndaryna, áleýmettik az qamtylǵan otbasylary men dárihanalarǵa, mektep qyzmetkerleri men oqýshylarǵa tegin taratyldy, dep habarlaıdy QazAqparat tilshisi.

Bul ıgi iske oblys kóleminde jalpy 1980 oqytýshy óz erikterimen qatysqan. Sonyń biri Kentaý qalasyndaǵy B.Momyshuly atyndaǵy jalpy orta mektebiniń ınformatıka pániniń muǵalimi Aıgúl Arystanbekova. Ol qoǵamǵa qaýipti indettiń taralýy kezinde dárihanalarda betperdelerdiń jetispeýshiligi alańdatqanyn jáne sol úshin betperde tigý isine belsene atsalysqanyn aıtty.

«Osyndaı qıyn shaqta biz birigýimiz kerek. Ózimizdi ǵana oılamaı jaqyndarymyzdy, áleýmettik jaǵdaıy tómen otbasylarǵa da qamqorlyq tanytqanymyz durys. Osy rette betperdeniń jetispeýshiligin bilgen soń ujymastarymyzben aqyldasyp, betperde tigýdi qolǵa aldyq. El basyna kún týǵan kezde qol qýsyryp otyrmaı, tyǵyryqtan shyǵýdyń joldaryn oılastyryp, ony iske asyrý árbir jannyń azamattyq boryshy dep bilemiz», – dedi Aıgúl Arystanbekova.

Aıta keteıik, atalǵan bilim ordasynyń qyzmetkerleri 22-30 naýryz aralyǵynda óz erikterimen kezekshilikke túsip, bir kúnde shamamen 2-2,5 myń dana betperdeden tikken. Mundaı erikti ustazdardyń ıgi bastamalaryn estigen qala turǵyndary da óz úılerinde betperde tigip myńǵa tarta betperdeni ortaq qorǵa qosqan.