Túrkistan oblysynda eń úzdik ónimderdiń kórme-jármeńkesi ótýde

TÚRKІSTAN. QazAqparat - Búgin Shymkent qalasyndaǵy «Kórme» ortalyǵynda Astananyń 20 jyldyǵyna oraı «ÓŃІRLІK ónimderi-2018» úzdik taýarlardyń kórme-jármeńkesi bastaldy, dep habarlaıdy QazAqparat.

Oblys jáne qala óndirýshilerin nasıhattaý maqsatynda ótken jármeńkede óńirde óndiriletin tamaq, farmatsevtıka, mashına jasaý, hımııa, jeńil jáne qurylys ónerkásipteriniń júzdegen taýarlary usynyldy.

Kórmege Shymkent jáne Túrkistan oblysynyń 200-den astam taýar óndirýshileri men Qazaqstannyń basqa aımaqtarynan kelgen taýar óndirýshiler qatysýda. Atalǵan sharaǵa alǵash ret kostıýmder men erlerge arnalǵan kıim tigetin, turmystyq hımııa shyǵaratyn 15 jańa kompanııa óz ónimderin alyp kelgen.

Ekikúndik kórmeniń ashylý saltanatyna  Túrkistan oblysynyń ákimi J.Túımebaev, Shymkent qalasynyń ákimi Ǵ.Ábdirahımov, oblystyq máslıhattyń hatshysy Q.Balabıev, Astana, Atyraý, Taraz qalalarynyń «Atameken» Kásipkerler palatasy basshylyǵy men basqa da óńirlerdiń kásipkerleri qatysty.

Otandyq taýar óndirýshilerdiń ónimderimen tanysqan oblys ákimi J.Túımebaev Qazaqstan  - Dúnıejúzilik saýda uıymyna, Eýrazııalyq ekonomıkalyq odaqqa, Shanhaı yntymaqtastyq uıymyna múshe bolyp tabylatynyn aıtyp, óńir kásiporyndary halyqaralyq jáne ekologııalyq standarttar talaptaryna saı keletin ónimder shyǵarýy qajet ekenin atap ótti. Іs-sharanyń barysynda oblys jáne qala ákimderi «Ordabasy qus» JShS men «Karlskrona LC AB» JShS-ǵa ónim jáne kyzmet kórsetý salasyndaǵy jetistigi úshin TMD syılyǵyn tabystady.

Budan bólek sharada «Qazaqstannyń úzdik taýary» atty baıqaý-kórmesi ótip, jeńimpazdar marapattalatyn bolady. Konkýrsqa kásibin jańa bastaǵan jáne tanymal otandyq taýar óndirýshiler qatysýda, olardyń arasynda «Madlen», «Ordabasy qus», «VızIT»,  «Raýan», «Altyn dán», «ShF Gaýhar», «Barys-2007», «Amangeldi», «Karlskrona», «Zerde keramıka», KTZ, «Bal tekstıl», «Nazar tekstıl», «Azala», «Planta», «Aıkan» jáne t.b. kásiporyndar bar.

Táýelsiz sarapshylar qatysýshylardy úsh nomınatsııa boıynsha irikteıdi. Atap aıtqanda, «Halyq tutynatyn úzdik taýarlar», «Óndiristik maqsattaǵy úzdik taýarlar» jáne «Úzdik azyq-túlik taýarlary».

Sonymen qatar, kórmede aımaqtyq nomınatsııalarmen eń úzdik kompanııalar tańdap alynady: «Halyq tańdaýy», «Jyl serpini», «Jyl brendi», «Áleýmettik mańyzy bar startap», «Úzdik áleýmettik joba», «Úzdik etnoóndirýshi», «Tabıǵı ónim óndirýshi» «Innovatsııalyq joba», «Jas óndirýshi», «Úzdi taýarlyq qaptama», «Úzdik eńbek jaǵdaılary» jáne «Eń úzdik áıel-jumys berýshi», «Qyzmet kórsetý salasyndaǵy úzdik joba», «Bıznes-výmen-ınnovator» nomınatsııalary boıynsha da áıelder bıznesine qoldaý kórsetiletin bolady.

Jeńimpazdar Astana qalasynda ótetin «Qazaqstannyń úzdik taýary» respýblıkalyq baıqaý-kórmesine qatysýǵa joldama alady.