Túrkistan oblysynda emhanaǵa tirkeý naýqany bastaldy

TÚRKІSTAN. QazAqparat – Túrkistan oblysynda emhanaǵa tirkeý naýqany bastalyp, turǵyndar qalaǵan emdeý mekemesin tańdap jatyr. Bul týraly óńirlik kommýnıkatsııalar qyzmetinde ótken brıfıngte «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynyń bólim basshysy Laýra Saparbekova málimdedi, dep habarlaıdy QazAqparat tilshisi.

Onyń aıtýynsha, turǵyndardyń óz aýmaǵynda emhanany erkin tańdaý naýqany 15 qyrkúıek pen 15 qarasha aralyǵynda júrgiziledi.

«MSAK uıymyna tirkelgen azamattar 2021 jyldyń 1 qańtarynan bastap medıtsınalyq kómek ala bastaıdy. Bul rette medıtsınalyq uıym - Qormen aldaǵy jylǵa arnalǵan tegin medıtsınalyq kómektiń kepildik berilgen kólemi sheńberinde jáne MÁMS júıesinde alǵashqy medıtsınalyq-áleýmettik kómek qyzmetterin kórsetýge shart jasasýy tıis. Naýqan qorytyndysy boıynsha medıtsınalyq uıymdar ózine tirkelgen azamattardy sany negizinde qarjylandyrylady. Árbir tirkelgen turǵyn úshin medıtsınalyq uıymdarǵa aı saıyn qarjy tólenedi», – deıdi «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynyń bólim basshysy Laýra Saparbekova.

Sala mamandarynyń sózinshe, emhanaǵa tirkelý birneshe tásilmen júzege asyrylady. Elektrondy úkimettiń www.e.gov.kz veb-portaly arqyly júgingen kezde tirkeý ETsQ arqyly júrgiziledi. Densaýlyq saqtaý bóliminde «Medıtsınalyq-sanıtarlyq alǵashqy kómek kórsetetin medıtsınalyq uıymǵa tirkelý» qyzmetin tańdaý qajet.

Emhana naýqas týraly aqparatty memlekettik aqparattyq júıelerden avtomatty túrde alady. Tirkelim sátti bolǵan jaǵdaıda azamatqa medıtsınalyq uıymnyń ETsQ qoıylǵan elektrondy qujat túrinde tirkeý týraly habarlama beriledi.

«Jalpy, Túrkistan oblysynda portalda 1 962 881 adam tirkelip tur. Osy jyldyń 31 jeltoqsanyna deıin azamattar buryn bekitilgen emhanada qyzmet kórsetýdi jalǵastyrady. Qyrkúıek aıyndaǵy jaǵdaı boıynsha oblysta 4 688 adam medıtsınalyq uıymdarǵa tirkelmegen kúıinde qalyp otyr. Medıtsınalyq kómeksiz qalmas úshin olar tikeleı turǵylyqty jeri boıynsha emhanada nemese ETsQ arqyly elektrondyq úkimettiń veb-portalynda tirkelýi tıis», - deıdi oblystyq qoǵamdyq densaýlyq basqarmasynyń ókili Baıan Aqberdıeva.

Sondaı-aq, saqtandyrý mártebesine qaramastan, barlyq azamattar tegin medıtsınalyq kómektiń kepildik berilgen kólemine quqyly ekeni de aıtyldy. Josparly emdeýge jatqyzý men beıindi mamandardyń qabyldaýy, qymbat turatyn tekserýlerden ótý jáne joǵary tehnologııalyq em alý úshin MÁMS júıesinde saqtandyrylǵan bolýy qajet.

Saqtandyrý mártebesin elektrondy úkimet portalynda, qor saıtynda jáne Telegram-daǵy SaqtandyryBot arqyly bilýge bolady.