Túrkistan oblysynda elimizdegi eń úlken jylyjaı kesheni salynady
Búgin Túrkistan oblysynyń ákimi Darhan Satybaldy ınvestorlarmen kezdesip, mańyzdy jobany talqylady. Aýqymdy qurylys jumystary jospar boıynsha naýryz aıynda bastalyp, bir jyldan soń iske qosylady. Oblys ákimi atalǵan jobanyń mańyzdylyǵyn atap ótti. Jylyjaı mega-kesheniniń jobasy «EKO-kýltýra» agroónerkásiptik holdınginiń qazaqstandyq seriktesi «Green Land Alatau» kompanııasynyń kómegi arqyly júzege asady.
Joba aıasynda ınfraqurylym júrgizý jumystary júrip jatyr. Keles aýdanynda júzege asatyn ınvestıtsııalyq joba aıasynda myńǵa jýyq jumys ornyn qurylady. Sonymen qatar ınvestorlar agrosala mamandaryn daıyndaıtyn reseılik joǵary oqý oryndarymen birlesip, aýyl sharýashylyǵy salasyndaǵy bilikti mamandardy daıyndaýdy qolǵa almaq.
«EKO-kýltýra» agroónerkásiptik holdıngi qyzmetiniń negizgi túri – óndiristik tsıkli jyl boıy jalǵasatyn jabyq topyraqta kókónis ósirý. Holdıngtiń quramyna Reseıdiń birneshe oblysyndaǵy jumys istep turǵan jylyjaı keshenderi kiredi. Investıtsııalyq jobany júzege asyrý úshin klımattyq jaǵdaıy qolaıly sanalatyn ońtústik óńiri arnaıy tańdalǵan.
«Bul óńirimizde júzege asatyn mańyzdy jobalardyń biri bolmaq. Aýyl sharýashylyǵy salasynda mamandardyń biliktiligin arttyrý da óte mańyzdy másele. Joba aıasynda jerlesterimiz úshin jumys oryndary ashylady. Oǵan biz qýanamyz. Aýyl sharýashylyǵy ónimderine suranys árqashan joǵary. Agroónerkásiptik keshendi odan ári damý áleýeti zor mańyzdy sala. Osyndaı iri jobany júzege asyrý biz úshin mańyzdy», – dedi Túrkistan oblysynyń ákimi Darhan Satybaldy.
Kezdesý qorytyndysy boıynsha taraptar ınjenerlik ınfraqurylymdy júrgizý, ınvestıtsııalyq sýbsıdııalar jáne jobany qarjylandyrýǵa qatysty máselelerdi muqııat pysyqtaýǵa kelisti. Zamanaýı jylyjaı keshenderi ósip jatqan daqyldardyń tolyq tsıklin baqylaıtyn, jylytý júıesi men salqyndatýdy, jaryq rejımin, tamshylatyp sýarýdy, atmosferadaǵy kómirqyshqyl gazynyń mólsherin basqaratyn zamanaýı avtomattandyrylǵan klımattyq baqylaý júıesimen jabdyqtalatyn bolady.