Túrkistan oblysynda eki aýdan qýańshylyqtyń zardabyn tartyp otyrǵan batysqa shóp jiberdi

TÚRKІSTAN. QazAqparat – Mańǵystaý oblysynda qýańshylyqqa tap bolǵan sharýalarǵa buǵan deıin maqtaaraldyqtar - 1 vagon, Jetisaı aýdanynyń turǵyndary - 74 tonna press shóp jóneltken bolatyn. Batystyq aǵaıynǵa kómek kórsetýdi endi shardaralyqtar men Qazyǵurt aýdanynyń turǵyndary jalǵady, dep habarlaıdy QazAqparat tilshisi.

Shardara aýdanynyń Q.Turysbekov aýyldyq okrýginiń azamattary shyǵynǵa ushyraǵan sharýalarǵa júk kóligimen 1000 dana oram shóp jóneltti.

Saýaby mol iske S. Ábdiramanov bastaǵan aýyl turǵyndary men meshit jamaǵaty jáne «Shaǵalaly Shardara» qaıyrymdylyq qorynyń músheleri atsalysqan.

Shardaralyq jomart jandardyń sózinshe, jınalmaǵan press shóbi áli kóp. Aldaǵy ýaqytta olardy taǵy da jiberý josparlanyp otyr.

Óz kezeginde Qazyǵurt aýdanynyń belsendi azamattary da Qurmet Talapqazynyń bastamasyna qoldaý bildirdi.

Batys oblystaryndaǵy qýańshylyqqa baılanysty Maılyoshaq eldi mekeniniń sharýa qojalyq ıeleri men aýyl turǵyndary kómek retinde jońyshqa, shóp, saban jınap Qyzylorda oblysyna jiberdi.

Osylaısha, qıyndyqqa tap bolǵan batys óńiriniń jurtshylyǵyna Túrkistan oblysynyń sharýalary qoldan kelgenshe járdem berýde.