Túrkistan oblysynda destrýktıvti dinı aǵymdardyń aldyn alý jumystary júrgizilýde

TÚRKІSTAN. QazAqparat – Túrkistan oblysynda dinı ekstremızm men destrýktıvti dinı aǵymdardyń úgit-nasıhatynyń aldyn alý baǵytynda túsindirý jumystary júrgizilýde, dep habarlaıdy QazAqparat tilshisi.

Osy maqsatta qurylǵan din salasyndaǵy oblystyq aqparattyq-túsindirý toptarynyń músheleri turǵyndarmen kezdesýler ótkizýde.

Otyrar aýdanyna arnaıy kelgen oblystyq «Din máselelerin zertteý ortalyǵy» mekemesiniń teolog-mamany A. Dúısen jergilikti halyqqa «Din salasyndaǵy ózekti máseleler» taqyrybynda baıandama jasap, beınerolıkter kórsetti. Teris dinı aǵymdardan saqtaný baǵytynda keńinen maǵlumat berdi. Baltakól aýylyndaǵy basqosýda top músheleri mektep oqýshylary men ustazdaryna jáne aýyl turǵyndaryna jat aǵymdardyń qoǵamǵa tıgizer zardaby jaıyn áńgimelep berdi.
«Mektep balany bolashaqqa daıyndap, keleshek ómirine baǵyt beretin uıa. Sondyqtan da biz birlese otyryp ul-qyzymyzdyń boıyna ulttyq tárbıe men ımandylyqty sińirýge bar kúshimizdi salýǵa tıispiz. Endeshe elimizde ultaralyq jáne dinaralyq tatýlyqtyń saqtalýy úshin, jas urpaqtyń keleshegi jarqyn bolýy úshin bir kisideı atsalysaıyq» - dedi teolog maman.
Sondaı-aq jıynda aýdandyq ishki saıasat bóliminiń bas mamany Q. Jandarbekov dinı ekstremıstik áreketter qazaq halqynyń saltyna jat ekenin, odan árbir azamat boıyn aýlaq ustaýǵa tyrysý qajet ekenin aıtyp ótti. Basqosý barysynda kópshilik tarapynan týyndaǵan saýaldarǵa tuşymdy jaýaptar berilip, oblystyq qoǵamdyq damý basqarmasy tarapynan arnaıy daıyndalǵan kitaptar taratyldy.