Túrkistan oblysynda da buzaqylar joldy jappaqshy bolǵan
Sherý kezindegi jaǵdaıdy paıdalanǵan buzaqylar Jetisaı, Arys, Saryaǵash aýdandarynda, Kentaý jáne Túrkistan qalalarynda búlik shyǵarýǵa tyrysty. Máselen, oblys ortalyǵynda 500-den astam adam kóshege jınalyp, joldardy, sondaı-aq temirjoldardy jappaqshy bolǵan.
Bul týraly Túrkistan oblysynyń komendanty, polıtsııa general-maıory Qaırat Dálbekov aıtyp berdi.
«Polıtseılerdiń aldynda qoǵamdyq tártipti buzýǵa jol bermeý jáne azamattardyń qaýipsizdigin qamtamasyz etý mindeti turdy. Al muny polıtseıler múltiksiz oryndady. Naqty jáne jedel is-áreketterdiń arqasynda jeke quram qyzmetkerleri shuǵyl qımyldap, jappaı tártipsizdik pen zań buzýshylyqqa múlde jol bermedi», - dedi Q.Dálbekov.
Jalpy, tótenshe jaǵdaı engizilgen ýaqyttan beri polıtsııa bólimderine túrli quqyq buzýshylyqtarmen 900-den astam adam jetkizilgen. Onyń ishinde 329 adam tótenshe jaǵdaı rejımin buzǵany úshin ákimshilik jaýapkershilikke tartylǵan.
Búgingi tańda Túrkistan oblysy aýmaǵyndaǵy jaǵdaı turaqty.