Túrkistan oblysynda byltyr 66,3 myń jumys orny quryldy
Oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaevanyń aıtýynsha, memlekettik jáne úkimettik baǵdarlamalar sheńberinde 66,3 myń jumys orny qurylsa, onyń ishinde 16,2 myńy – turaqty, 50,1 myńy – ýaqytsha jumys orny.
«2020 jylǵy 3-toqsandaǵy statıstıkalyq málimetke sáıkes, jumyssyzdyq deńgeıi - 5,2%, jastar jumyssyzdyǵy - 3,8%, áıelder arasyndaǵy jumyssyzdyq deńgeıi 6,6% qurady. Daǵdarysqa qarsy sharalar retinde «Jumyspen qamtýdyń jol kartasy» iske asyryldy. Nátıjesinde 482 ınfraqurylymdyq jobany iske asyrýǵa kózdelgen 110 mlrd teńge aıasynda 26 908 jańa jumys orny quryldy», - dedi Ásııa Quralqyzy.
Sonymen qatar, oblysta 2020 jyly az qamtamasyz etilgen 39 159 otbasyǵa (220 055adam) 14 mlrd teńge qarjy taǵaıyndalyp, 39 060 otbasyǵa (219 434 adam) 13,8 mlrd teńge ataýly áleýmettik kómek tólengen. Bul 2019 jylmen salystyrǵanda ataýly áleýmettik kómekti alýshylardyń sany 64,3% azaıǵandyǵyn kórsetedi.
Odan bólek, eńbekke jaramdy ataýly áleýmettik kómek alýshy 20 937 turǵyn jumyspen qamtý sharalaryna tartylǵan. Onyń ishinde 15 601 adam turaqty jumyspen qamtyldy.
Ataýly áleýmettik kómektiń qarjy esebinen 214 adam kásipkerlikpen aınalysý úshin óz isin ashty.
Sondaı-aq, kepildendirilgen áleýmettik toptama boıynsha 1-6 jastaǵy 45 429 bala azyq-túlik jıyntyǵy men gıgıenalyq quraldaryn alǵan.
Al ómirlik qıyn jaǵdaıǵa tap bolǵan otbasylar úshin oblysta «Qamqorlyq» baǵdarlamasy iske asyrylýda, onyń sheńberinde az qamtylǵan 1 643 otbasy 516,2 mln teńgege demeýshilik kómek aldy.
Túrkistan oblysynda 94,5 myń múgedektigi bar azamat esepte tur. 2020 jyly bul maqsatqa barlyq deńgeıdegi bıýdjetter esebinen 4,8 mlrd teńge bólingen. Nátıjesinde 48 myń muqtaj azamattyń ishinen 34 myń adam tehnıkalyq ońaltý quraldarymen qamtamasyz etilip, áleýmettik qyzmetter usynyldy.