Túrkistan oblysynda buryn sotty bolǵan adamnyń kóliginen 2,5 keli marıhýana tabyldy
Oblystyq PD baspasóz qyzmetiniń málimetinshe, atalǵan qylmys óńirde «Qarasora-2022» jedel profılaktıkalyq is-sharasy aıasynda ashylǵan. Esirtki qylmysyna qarsy is-qımyl basqarmasynyń qyzmetkerleri jedel aqparat túsken boıda «Jibek joly-Shymkent» tas jolymen ketip bara jatqan jeńil kólikti toqtatqan. Sodan kúdiktilerdiń avtokóligine tintý jumystaryn júrgizip, nátıjesinde ósimdik tektes esirtki zattary bar polıetılen paket pen qaǵaz túıinshekti tapqan. Tártip saqshylary tárkilengen zattaı dáleldemelerdi saraptamaǵa jibergen. Zertteý qorytyndysy kólikten alynǵan esirtkiniń 2,5 keli bolatyn marıhýana ekenin rastady.
«Esirtki saqtaý, tasymaldaý deregi boıynsha kúdikti retinde kólik júrgizýshisi men jolaýshysy, ıaǵnı buryn sotty bolǵan Saryaǵash aýdanynyń eki turǵyny ustaldy. Atalǵan jaıt QR QK-niń 296-baby «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» boıynsha tirkeldi. Qazirgi ýaqytta sotqa deıingi tergeý amaldary júrgizilip jatyr. Polıtseıler oqıǵanyń tolyq mán-jaıy men kúdiktilerdiń basqa da osyǵan uqsas qylmystarǵa qatystylyǵyn anyqtaıdy», - delingen habarlamada.