Túrkistan oblysynda bir jarym jasar bala dárethanaǵa qulap ketti

TÚRKІSTAN. QazAqparat - Túrkistan oblysynda bir jarym jasar bala tereńdigi tórt metr bolatyn dárethanaǵa qulap ketken. Óńirdiń qutqarýshylary sábıdi der kezinde qutqaryp qaldy, dep habarlaıdy QazAqparat tilshisi.

Oblystyq TJD baspasóz qyzmetiniń málimetinshe, oqıǵa Qazyǵurt eldimekenindegi úılerdiń birinde bolǵan. Dárethanaǵa túsip ketken balany ózdiginen shyǵara almaǵan turǵyndar «112» qyzmetine habarlasyp, qutqarýshylardy kómekke shaqyrtqan.

«Avarııalyq-qutqarý jumystaryna Túrkistan oblysy TJD 5 qutqarýshysy men medıtsınalyq jedel járdem qyzmetiniń 3 qyzmetkeri, polıtsııa departamentiniń 2 qyzmetkeri kelgen. Qutqarýshylar saǵat 15:03-te shuńqyrǵa qulap ketken balany qutqarý arqanynyń kómegimen shyǵaryp, jedel járdem qyzmetkerlerine tapsyrdy. Bala dárigerdiń tekserýinen keıin úıine jiberildi. Qazirgi ýaqytta balanyń jaǵdaıy turaqty» delingen habarlamada.

Aıta keteıik, buǵan deıin Kentaý qalasynda jol astyndaǵy qubyrǵa túsip ketken 2 jastaǵy bala qutqarylǵan bolatyn. Qutqarýshylar 15 metrdeı jerde keptelip qalǵan balany aman alyp shyqqan edi.