Túrkistan oblysynda bir mezette 3000 dombyrashy kúı oryndady

TÚRKІSTAN. QazAqparat - «Ulttyq dombyra» kúnin túrkistandyqtar keń kólemde atap ótti. Búgin Túrkistan oblysynyń ortalyǵyndaǵy Q.A.ıAsaýı kesenesiniń aldynda «Ulttyq dombyra kúni» merekesi atalyp ótildi. Saltanatty sharada 1000 dombyrashy Qurmanǵazynyń «Saryarqa», «Balbyraýyn», Túrkeshtiń «Kóńilashar» kúılerin oryndady, dep habarlaıdy QazAqparat.

Ulttyq dástúr men ónerdi jańǵyrtyp, dáripteýge jol salatyn bul mereke  qolóner sheberleri men sýretshilerdiń kórmesimen bastaý aldy. Óńirde  barlyq aýdan, qalalarda bir mezgilde dombyrashylardyń fleshmoby uıymdastyryldy. Osylaısha jalpy sany 3 myńnan astam dombyrashy ulttyq ónerdi dáriptedi. Sonymen qatar, Q.A.ıAsaýı kesenesi aldynda Sh.Qaldaıaqov atyndaǵy oblystyq fılarmonııanyń «Súgir» atyndaǵy ult aspaptar orkestiriniń kontsertimen jalǵassa, merekelik kún «Kúı qudireti» kúıshilerdiń oblystyq baıqaýymen qorytyndylandy.

  Ulttyq dombyra kúni merekesiniń ashylý saltanatyna qatysqan Túrkistan oblysy ákiminiń orynbasary Ulasbek Sádibekov barsha turǵyndardy osynaý merekemen quttyqtady.

«Dombyra - qazaq halqynyń eń keń taraǵan eki ishekti, kóp perneli mýzykalyq aspaby. Ol - qazaqtar ómirinde mańyzdy oryn alatyn, ózindik mýzykalyq sıpaty bar aspap. Alǵash epıkalyq dástúr sheńberinde jyr, tolǵaý, termelerdi súıemeldeýge qoldanylǵan dombyra keıin aspaptyq shyǵarma - kúı janrynyń qalyptasýyna yqpal etken. XIX ǵasyrda qazaq halqynyń turmysynda anaǵurlym keń taraǵan Mýzykalyq aspap eki ishekti dombyra bolatyn. Ár túrli eskertkishterge, sondaı-aq etnograftardyń jazyp qaldyrǵan eńbekterine júginsek, dombyra jáne ózge halyqtardyń osy tektes aspaptary tipti sonaý orta ǵasyrlarda belgili bolǵan eken. Mysaly, Ábý Nasyr ál-Farabıdiń eńbekterinen tambýr aspaby jaıynda oqımyz. Qazaqtyń halyq aspaby dombyra XIV ǵasyr jazbalarynda kezdesedi. Onyń bastaǵy túri men qurylysy qazaqtyń dombyrasynan aýmaıdy, osyndaı aspap attarynyń uqsastyǵy da olardyń túpki shyǵý tegi bir ekenin kórsetse kerek»,-dedi oblys ákiminiń orynbasary Ulasbek Sádibekov.

«Ulttyq dombyra kúni» merekesi Túrkistan oblysynyń barlyq aýdan, qalalardyń mádenıet jáne óner mekemelerinde, ortalyq saıabaqtarda, oıyn-saýyq ortalyqtarynda, ashyq alańdarda túrli mádenı is-sharalar ótkizilýde.