Túrkistan oblysynda barlyq baǵyttaǵy joldar ashyldy

TÚRKІSTAN. QazAqparat - Túrkistan oblysynda barlyq baǵyttaǵy joldar ashyldy, dep habarlaıdy QazAqparat tilshisi.

Oblystyq TJD bastyǵynyń orynbasary Erik Sarybaevtyń aıtýynsha, óńirde úzilgen elektr jelileri qalpyna keltirilgen. Sóıtip 30-dan asa eldi mekendegi turǵyndarǵa jaryq berilgen. Dese de keshegi qatty borannyń saldarynan áli de Túrkistan qalasy men Báıdibek, Sozaq, Saıram jáne Tólebı aýdandaryndaǵy 25 eldi mekende 5 myńǵa jýyq abonent jaryqsyz otyr. Apat saldaryn joıýǵa jaryqqa jaýapty mekemeniń 11 brıgadasyndaǵy 50-ge jýyq maman men 12 arnaıy tehnıkasy jumyldyrylǵan. Jolda qalǵan jeńil jáne júk kólikteriniń júrgizýshilerine de tıisti kómekter berilgen. Alaıda aýa raıyn boljaıtyn mekeme mamandarynyń habarlaýynsha aldaǵy kúnderi óńirde taǵy da aýa raıy ózgerýi múmkin. Sondyqtan mamandar júrgizýshiler men jolaýshylarǵa jolǵa shyqqanda abaı bolýdy eskertedi.

«18 qarasha kúni túnde de Túrkistan oblysynyń taý bókterli aýdandarynda qatty jaýyn-shashyn, jańbyr, qar, oblystyń soltústiginde, batysynda, ońtústiginde shańdy daýyl kútilýde. Oblystyń basym bóliginde jeldiń jyldamdyǵy 15-20 metr sekýnd, oblystyń taýly aýdandarynda 23-28 sek, al taýlardaǵy asýlarda 30 metr sek deıin jetýi yqtımal», - deıdi Erik Sarybaev.