Túrkistan oblysynda balalardy mektepke tasymaldaý úshin 30 avtobýs beriledi
Túrkistanda 1 maýsym – Halyqaralyq balalardy qorǵaý kúnine oraı «Balalardyń ıgiligi úshin» gala-kontserti ótti. Aldymen «Kongress Holl» kesheninde Ordabasy, Saryaǵash, Kentaý saz mektepteriniń oqýshylary Qurmanǵazynyń kúılerin tartsa, arnaıy fotokórme kópshilik nazaryna usynyldy. Merekelik jıynǵa Túrkistan oblysy ákiminiń orynbasary Beısen Tájibaev pen oblystyq máslıhat tóraǵasy Nuraly Ábishov qatysyp, balalardy, oqýshylardy tól merekesimen quttyqtady.
«Túrkistan – daryndy, bilimdi, ónerli balalarymen maqtanatyn erekshe óńir. Bıylǵy oqý jylynda óńirimizde 500 myńnan astam bala bilim aldy. Oblysymyzda 1000-shy mektep ashyldy. El Prezıdentiniń tikeleı qoldaýymen balalarǵa, óskeleń urpaqqa jaǵdaı jasaý úshin ıgi bastamalar qolǵa alynyp jatyr. Aldaǵy 3 jylda oblysta 96 mektep boı kóteredi. Bıyl oblys mektepterine 101 avtobýs bólinip, 71-i tapsyrylǵan bolatyn. Al búgin qalǵan 30 avtobýsty usynyp otyrmyz. Jazǵy demalysta 26 myńnan astam balany demalys lagerlerine jiberý josparlanǵan. Túrkistan óńirinde «Qaýipsiz mektep» jobasyn júzege asyramyz. Balalardyń damýyna, bilim alýyna jan-jaqty jaǵdaı jasaý jalǵasady», – dedi Beısen Tájibaev.
Saltanatty jıynda halyqaralyq, respýblıkalyq baıqaýlardyń jeńimpazdary marapattaldy. 15 oqýshyǵa oblys ákiminiń Alǵys haty men 200 myń teńgeniń sertıfıkattary tapsyryldy. Bıyl oblys shákirtteri halyqaralyq, respýblıkalyq ǵylymı joba baıqaýlary men pán olımpıadalarynda 9 altyn, 17 kúmis, 20 qola medal ıelendi. Respýblıkalyq «Ulttyq mektep lıgasy» jarysynda Túrkistan órenderi 10 altyn, 4 kúmis, 5 qola medalǵa qol jetkizip, jalpykomandalyq esepte úsh jyl qatarynan I orynǵa ıe boldy.
Gala-kontsertte Túrkistan oblysynyń aýdan, qalalarynan iriktelgen úzdik, ónerli jáne talantty oqýshylar men balalar óz ónerlerin kórsetti.
Ánnen shashý shashylyp, bı bılendi. Sondaı-aq Aqjol Meıirbekov, Aıdar Turǵambek syndy elge tanymal estrada juldyzdary da balalardy merekemen quttyqtap, ánderin shyrqady. Merekege qatysýshy oqýshylarǵa oblys ákimi atynan «Qasym kitaphanasy» serııasy arqyly jaryq kórgen myńnan asa kitap syıǵa tartyldy.