Túrkistan oblysynda balabaqsha memtapsyrysyndaǵy jemqorlyq jaıynda shaǵymdar bolǵan

NUR-SULTAN. QazAqparat – Túrkistan oblysynda mektepke deıingi uıymdarda memlekettik tapsyrystardy ornalastyrý boıynsha sybaılas jemqorlyqqa qatysty shaǵym tústi. Bul týraly QR Oqý-aǵartý mınıstri Ashat Aımaǵambetov málim etti, dep habarlaıdy QazAqparat tilshisi.

«Mektepke deıingi uıymdarda memlekettik tapsyrystardy ornalastyrý boıynsha sybaılas jemqorlyqqa qatysty shaǵymdar boldy. Endi bul aqparat zerttelip, tekserý qorytyndysy boıynsha shara qabyldanady. Esep berý kezdesýinde qoıylǵan saýaldyń barlyǵyna jaýap bergennen keıin aýdandardyń, qalalardyń bilim bólimderi men kolledj basshylarymen jeke jıyn ótkizdim», - dep málimdedi Ashat Aımaǵambetov Túrkistan oblysyna saparyn qorytyndylaı kele.

Mınıstrdiń aıtýynsha, atalǵan óńirde bilim salasy boıynsha birqatar sheshilmegen másele bar.

«Túrkistan oblysynda bilim basqarmasynyń qazirgi basshysynyń taǵaıyndalǵanyna az ǵana ýaqyt boldy. Endi onyń aldynda qordalanǵan máselelerdi sheshý boıynsha mańyzdy mindetter tur», - deıdi ol.

Sondaı-aq, A. Aımaǵambetov Túrkistan oblysynyń turǵyndaryna bilim salasyna beıjaı qaramaıtyndyǵy úshin alǵysyn aıtty.

Buǵan deıin Oqý-aǵartý mınıstri atalǵan óńirde muǵalimder men mektep dırektorlary arasyndaǵy qarym-qatynastyń máz emestigin aıtqan edi.