Túrkistan oblysynda azyq-túlikti tegin taratatyn dúkender jumys isteıdi
Memleket basshysy Nursultan Nazarbaev kezekti Joldaýynda baǵa máselesin ózi baqylaýǵa alatynyn aıtqan bolatyn. «Bul mańyzdy másele. Baǵanyń ósýine eshqandaı da jol bermeý kerek. Ásirese, Qazaqstanda óndirilip jatqan azyq-túlik taýarlaryna baǵa óspeýi tıis», - dedi Elbasy. Osyǵan oraı, Túrkistan oblysynda birqatar júıeli jumystar atqarylýda.
Máselen, qazirgi tańda Túlkibas aýdanynda 6 áleýmettik dúken jumys isteıdi. Olar halyq kóp shoǵyrlanǵan Túlkibas, Sastóbe, Balyqty, Jabaǵyly, Jaskeshý jáne aýdan ortalyǵy T.Rysqulov aýyldarynda ornalasqan. Ashylǵanyna bir jyldan astam ýaqyt ótken dúkenderde halyqtyń az qamtamasyz etilgen toptaryna azyq-túlik naryqtaǵy baǵadan 15-20 paıyzǵa arzan satylýda. Áleýmettik dúkenderge aýyldyq okrýg ákimdikteri eldimekenderdegi az qamtamasyz etilgen januıalardyń tizimin ótkizip, sol tizimdegi azamattar jeke kýáligimen azyq-túlikti arzandatylǵan baǵamen ala alady. Ári kásipkerlerge qolaıly jaǵdaılar jasalyp otyr.
Dál osyndaı dúken Tólebı aýdany Kóksáıek eldimekeninde de iske qosyldy. Áleýmettik jaǵynan osal otbasylarǵa arnalyp ashylǵan dúkende demeýshiler esebinen muqtajdarǵa azyq-túlik, kıim-keshek taǵy da basqa turmystyq zattar tegin berilýde. Lengir qalasyndaǵy Dostyq eldimekenindegi «Nur-Janar» dúkenderinen kópbalaly analar men turmystyq jaǵdaıy tómen januıalar kez kelgen qajetti turmystyq taýarlar men kıim-keshekterdi tegin ala alady.
Sol sııaqty Keles aýdanynyń Ushqyn aýyldyq okrýginde áleýmettik dúken jergilikti turǵyndardyń qajetine jaraýda. Búgingi tańda atalǵan dúkennen kópbalaly jáne áleýmettik turmys jaǵdaıy tómen 22 otbasy tıisti kómekterin alýda. Kez kelgen tamaq ónimderi men kıimder aqysyz berilýde.