Túrkistan oblysynda azyq-túlik baǵasy belgilengen mejege saı emes
«Jergilikti turǵyndar kóp shoǵyrlanatyn saýda oryndaryn araladyq. Eń qajetti áleýmettik azyq-túlik jetkilikti ekeni anyqtaldy. Halyq kóp tutynatyn 20-ǵa jýyq ónimniń baǵalaryn bekitilgen talapqa saı nemese saı emes ekenin naqtylap, kásipkerlerdi taýar baǵasyn sebepsiz ósirmeýge shaqyrýdamyz», - dedi «AMANAT» partııasy Túrkistan qalalyq fılıalynyń atqarýshy hatshysy Ǵappar Sársenbaev.
Sondaı-aq, salystyrmaly túrde anyq bolǵanyndaı, qaladaǵy eń iri saýda oryndarynyń biri - «Qýanysh» bazarynda kartop baǵasy – 200 teńge, sábiz jáne pııaz - 250 teńgeden satylsa, «Halyq» saýda ortalyǵynda kartop – 195 teńge, sábiz – 160 teńge, pııaz - 250 teńge. Al, sıyr etiniń ortasha baǵasy - 1 853 teńge bolýy tıis. Degenmen, bazarlardaǵy satylym baǵasy - 2 500 teńge.
«Halyq» saýda ortalyǵynyń dırektory Nurjan Tálipov baǵa qubylmalylyǵy ónimniń tapshylyǵyna baılanysty degen pikirin bildirdi.
«Azyq-túlik baǵalarynyń qubylmaly bolýy taýarlardy bizge alyp keletin jetkizýshilerge baılanysty. Máselen, qazir qyzanaq baǵasy - 95 teńge bolsa, qııar - 230 teńgeden satylyp jatyr. Qaı ónim tapshy bolsa, sol zattyń baǵasy osylaı ózgerip turady», - deıdi ol.
Partııanyń aımaqtyq jáne aýmaqtyq fılıaldary janynan qurylǵan jumys toptary áleýmettik mańyzǵa ıe azyq-túlik taýarlarynyń baǵalaryna taldaý jumystaryn turaqty júrgizbek. Saraptama nátıjeleri jergilikti atqarýshy organdarǵa joldanyp otyrady.