Túrkistan oblysynda Azamattyq forým ótti

TÚRKІSTAN. QazAqparat- Búgin Túrkistan qalasynda «Qoǵam men memlekettiń turaqty damýy múddesindegi áriptestiktiń 30 jyldyǵy» taqyrybynda Túrkistan oblysynyń H Azamattyq forýmy bolyp ótti, dep habarlaıdy QazAqparat tilshisi.

Qazaqstan Respýblıkasy Táýelsizdiginiń 30 jyldyǵy aıasynda ótken dástúrli jıynǵa Túrkistan oblysynyń ákimi Ómirzaq Shókeev, oblystyq máslıhat hatshysy Qaırat Balabıev, «Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaev jáne Túrkistan oblysyndaǵy memlekettik organdar men bıznes-qurylymdardyń basshylary, qoǵamdyq birlestikterdiń kóshbasshylary, úkimettik emes uıymdar men buqaralyq aqparat quraldarynyń ókilderi qatysty.

«Túrkistan oblysynyń Azamattyq Alıansy» zańdy tulǵalar birlestiginiń prezıdenti Sháripbek Jamalbek forýmnyń maqsat-mindetterimen tanystyrdy.

Túrkistan oblysyndaǵy azamattyq qoǵamnyń jumystaryn saralaý, respýblıkalyq H Azamattyq forýmǵa qatysatyn delegattardyń tizimin bekitý jáne «Túrkistan oblysynyń Azamattyq alıansy» ZTB prezıdentin qaıta saılaý máseleleri kún tártibine qoıyldy.

Túrkistan oblysynyń ákimi Ómirzaq Shókeev eldiń damýy jolynda úkimettik emes uıymdardyń alar ornynyń joǵary ekendigin aıtyp ótti.

«Bıyl elimizdiń Táýelsizdik merekesine 30 jyl tolyp otyr. Bul belesti Túrkistan óńiri tolaıym tabystarmen qarsy aldy. Bul jetistikke qoǵamnyń barlyq músheleriniń úlesi bar. Úkimettik emes uıymdar ár baǵyttaǵy ustanymdaryna qaramastan barlyǵy bir maqsat, bir múdde jolynda áreket etýi tıis. Ol – Qazaqstannyń turaqtylyǵy, eldiń barlyq baǵytta damýy. Azamattyq qoǵam ınstıtýttary men memlekettik qurylymdardyń birlesken úılesimdi jumysynyń nátıjesinde biz táýelsizdiktiń jetistikterin jetildire túserimizge senimdimin» dep azamattyq qoǵamdy damytý baǵytyndaǵy atqarylyp jatqan jumystardyń barysyn baıandady.

Jıynda «Shapaǵat» múgedekterdiń qaıyrymdylyq qory qoǵamdyq birlestiginiń tóraǵasy Shaltan Erkinbaı, «Generation» qoǵamdyq birlestiginiń tóraǵasy Golıarko Vladıslav, «Túrkistan oblysy ata-analar qaýymdastyǵy» qoǵamdyq birlestiginiń tóraıymy Aqbaıan Jaqypova, «Bereke» qoǵamdyq birlestiginiń joba úılestirýshisi Gúlsim Andabaeva óz sózderinde óńirdegi azamattyq qoǵamdy qalyptastyrý baǵytyndaǵy oı-pikir, usynystaryn ortaǵa saldy. Sondaı-aq forým aıasynda 2021 jylǵy 22-26 qarasha kúnderi Almaty qalasynda ótetin respýblıkalyq H Azamattyq forýmǵa qatysatyn delegattardyń quramy anyqtalyp, oblysqa bólingen kvota boıynsha 5 delegat anyqtaldy.

Jıynda «Eń úzdik ÚEU» baıqaýynyń jeńimpazdary, áleýmettik ıdeıalar men jobalar jármeńkesiniń úzdikteri marapattaldy.