Túrkistan oblysynda aýylsharýashylyǵy ónimin óńdeıtin 45 kásiporyn iske qosylady

TÚRKІSTAN. QazAqparat - Túrkistan oblysy 2025 jylǵa qaraı 58 156 tonna etti qaıta óńdep eksporttaıtyn bolady. Aldaǵy ýaqytta 49 195 tonna taýar qaıta óńdelmek. Bul týraly oblystyq aýyl sharýshylyǵy basqarmasynyń basshysy Nurbek Badyraqov oblys ákimi Janseıit Túımebaevtyń tóraǵalyǵymen ótken jıynda málimdedi, dep habarlaıdy QazAqparat tilshisi.

Basqarma basshysynyń sózinshe, búginge deıin óńirde 43 myń tonna sút qaıta óńdelip kelse, keleshekte onyń kólemi 92 myń tonnaǵa artady. Mundaı jetistikterge jańadan ázirlengen «Túrkistan oblysynda agroónerkásiptik keshenin damytýdyń óńirlik baǵdarlamasy» aıasynda qol jetkiziletin bolady. 

«Aýyl sharýashylyǵy ónimderin qaıta óńdeý salasynda oblysymyzda jalpy 107 kásiporyn jumys istep keledi. Onyń 38 et, 35i sút, 34 kásiporyn jemis-kókónis ónimderin qaıta óńdeýmen aınalysady. Baǵdarlama aıasynda 2025 jylǵa qaraı oblys aýmaǵynda aýyl sharýashylyǵy ónimderin qaıta óńdeý kásiporyndarynyń sany 45 birlikke jetkizý josparda bar. Jospar júzege assa, eksport kólemi 2,5 artady», - dedi Nurbek Badyraqov. 

Sondaı-aq ótken jyly qaıta óńdelgen aýyl sharýashylyǵy ónimderi eksportynyń kólemi 231,5 mln AQSh dollaryn quraǵan. Bul kórsetkishti 2022 jylǵa qaraı 578,8 mln AQSh dollarǵa jetkizý josparlanýda. Daıyn ónimderdiń  41,5 paıyzy Reseı, Belarýs, Qyrǵyzstan elderine, 38,5 paıyzy Ózbekstanǵa 9,2 paıyzy Aýǵanstan Respýblıkasyna jóneltilgen. 2022 jylǵa qaraı eksport kólemin 4,1 mln tonnaǵa jetkizý kózdelýde.

Baǵdarlama aıasynda óńirdegi agoroónerkásip keshenin damytý maqsatynda azyq-túlik qaýipsizdigin qamtamasyz etý jáne eksportty ártaraptandyrý úshin Túrkistan qalasynyń aýmaǵynda agro aımaqtar qurylmaq. Budan bólek, 2019 jyly dızel otynyn elektrondy taratý, 2020 jyly kókónis-jemis, baqsha, maqta jáne mal sharýashylyǵy ónimderin satýda elektrondy saýda sattyqty júzege asyrý josparlanýda.