Túrkistan oblysynda aýyl turǵyndarynyń urlanǵan maly qaıtaryldy

TÚRKІSTAN. QazAqparat - Túrkistan oblysynda mal urlyǵyn kásip etken barymtashylar ustaldy. Qylmystyq top músheleriniń jábirlenýshilerge mıllıon teńgege jýyq shyǵyn keltirgeni anyqtalyp otyr, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, top músheleri aldymen aýyl turǵyndarynyń biriniń úıiniń aýlasynan 150 myń teńge turatyn sıyryn urlap ketken. Osy sekildi túrli aryzdarmen polıtsııaǵa taǵy da Otyrar aýdanynyń birneshe jergilikti turǵyn aryzdanǵan.

«Atalǵan qylmysty ashý úshin tájirıbeli polıtsııa qyzmetkerlerinen jedel-tergeý toby quryldy. Polıtseıler aýdandaǵy barlyq úılerdi tekserip shyqqan. Kórshiles polıtsııa bólimderine baǵdar berildi. Polıtseıler kórshiles aýdannan urlanǵan maldy satyp jibermekshi bolǵan kúdiktilerdi ustady. Olar, Arys jáne Ordabasy aýdanynyń 4 turǵyny ekeni anyqtaldy. Tergeý barysynda seziktilerdiń taǵy 5 urlyqqa qatysy barlyǵy belgili boldy. Aıǵaqty zat retinde mal men avtokólik tárkilendi», delingen habarlamada.

Qazirgi tańda sottyń sheshimimen 1983 jáne 1984 jylǵy eki aıyptalýshy 2,5 jylǵa sottaldy. Al qalǵan kúdiktilerge qatysty qylmystyq is toqtatyldy. Sebebi, olar jábirlenshi mámile jasasqan.

Al, urlanǵan mal ıelerine qaıtaryldy.