Túrkistan oblysynda aýyl turǵyndary bir úıdiń 9 adamyn órtten qutqardy

TÚRKІSTAN. QazAqparat - Túrkistan oblysynda aýyl turǵyndary bir úıdiń 9 adamyn órtten qutqaryp qaldy, dep habarlaıdy QazAqparat tilshisi.

Oqıǵa Báıdibek aýdanyna qarasty Shaldar eldi mekeninde bolǵan. Túngi saǵat 01:00 shamasynda Tólemis Baıjanov esimdi azamattyń úıinde órt shyqqan. Úıdiń órtenip jatqanyn baıqaǵan kórshisi Erkeǵalı Turarov alǵashqy bolyp kómekke umtylǵan. Keıinnen kórshi turatyn Ǵalymjan Nurnazarov pen Iranpýr Navrýzı kómekke kelgen.

Beıbit kúnniń batyrlary Tólemis Baıjanovtyń 70 jastaǵy anasyn, júkti áıeli men 7 ul-qyzyn, jalpy bir úıdiń 9 adamyn qaýipsiz jerge shyǵaryp, aman alyp qaldy. Al úı ıesi vahtalyq jumysta bolǵan.

Qazirgi tańda órttiń shyǵý saldary tekserilip jatyr. Zardap shekken azamattar dárigerdiń baqylaýyna alynǵan. Aýdan turǵyndary atalǵan otbasyǵa kómek berýde.