Túrkistan oblysynda «Aýyl – el besigi» jobasy qalaı júzege asyrylyp jatyr

TÚRKІSTAN. QazAqparat - Qarjy mınıstri Erulan Jamaýbaev «Aýyl – el besigi» jobasynyń júzege asyrylý barysymen tanysty, dep habarlaıdy QazAqparat.

Qarjy mınıstri Erulan Jamaýbaev Túrkistan oblysyndaǵy «Aýyl - el besigi» baǵdarlamasy aıasynda júzege asyrylyp jatqan áleýmettik nysandardy aralady.

Qarjy mınıstrliginiń basshysy Ordabasy, Báıdibek, Qazyǵurt aýdandarynyń bilim jáne densaýlyq saqtaý, mádenıet jáne sport nysandaryn baryp kórdi.

Sondaı-aq, Jamaýbaev Shymkentte aýdan, qala ákimderi men basqa da memlekettik organdardyń qatysýymen qorytyndy keńes ótkizdi.

Qarjy mınıstri oblystyq bıýdjetke «Aýyl - el besigi» jobasyn júzege asyrýǵa respýblıkalyq bıýdjetten 14,9 mlrd teńge bólingenin atap ótti.

Budan bólek, respýblıkalyq bıýdjetten oblysqa jan-jaqty kómek kórsetilýde.

Bıyldyń ózinde sýbventsııa kólemi 392 mıllıard teńgeni qurasa, onyń 305 mıllıard teńgesi oblysqa aýdarylǵan.

Sonymen qatar, 2019-2021 jyldar aralyǵynda Úkimet rezervinen 116,6 mlrd teńge berilip, oblystyń áleýmettik-ekonomıkalyq damýynyń mańyzdy basym mindetterin iske asyrýǵa 318 mlrd teńge nysanaly transfert bólindi.