Túrkistan oblysynda ataýly áleýmettik kómekke 70 mlrd teńgeden astam qarajat bólingen – Ómirzaq Shókeev
Oblys basshysynyń aıtýynsha, jalpy áleýmettik qamsyzdandyrý salasyna 2019 jyly 82 mlrd teńge qarjy qarastyrylǵan.
«Óńir turǵyndaryn jumyspen qamtý maqsatyndaǵy «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy 96 myńǵa jýyq adamdy qamtyp, jospar 20,6%-ǵa artyǵymen oryndaldy. Osy baǵdarlama aıasynda birinshi ret óz isin ashamyn deıtin azamattarǵa 200 aılyq eseptik kórsetkish mólsherinde 8 myńǵa jýyq azamatqa memlekettik grant usynylyp, jeke isin ashýǵa múmkindik berildi»,- dedi Ómirzaq Estaıuly.
Aımaq basshynyń sózinshe, byltyrǵy jyly az qamtylǵan azamattardy áleýmettik qoldaý boıynsha aýqymdy jumys júrgizilgen. Atap aıtsaq, ataýly áleýmettik kómekke 70 mlrd teńgeden astam qarajat bólingen. Bul soma ózge jyldarmen salystyrǵanda anaǵurlym qomaqty sanalady. Sonyń nátıjesinde oblys halqynyń úshten bir bóligi ataýly áleýmettik kómek aldy nemese ár otbasy orta eseppen aıyna 100-120 myń teńge kóleminde áleýmettik kómekpen qamtylǵan.
«Kómek alýshylardyń 60 paıyzy kóp balaly otbasylar sanatynan. Osyndaı qoldaýdyń arqasynda 6 690 otbasy áleýmettik kómek esebinen óz isin ashýǵa jáne óz tabysyn arttyrýǵa múmkindik alyp, 43 myń jumyssyz azamat ataýly áleýmettik kómek aıasynda jumyspen qamtyldy. Bıylǵy jyly da áleýmettik qoldaýda eleýli ózgerister oryn aldy. Birinshiden, kóp balaly otbasylardyń mártebesin arttyrý maqsatynda olar jeke sanatqa shyǵaryldy. ıAǵnı, 2020 jyly otbasynyń tabysyna qaramastan 4 jáne odan da kóp balaly otbasylarǵa bala sanyna qaraı 43 myńnan 73 myń teńge aralyǵynda memlekettik járdemaqy taǵaıyndaý bastaldy. Qazirdiń ózinde 100 myńnan astam otbasy osy járdemaqyny aldy»,- dedi Ómirzaq Shókeev.