Túrkistan oblysynda aryq-atyzdar tazalanyp, aýyldar aǵyn sýmen qamtylyp jatyr

TÚRKІSTAN. QazAqparat – Túrkistan oblysynda tozyǵy jetken aryq-atyzdar tazalanyp, aýyldardy aǵyn sýmen qamtý máselesi sheshimin taýyp keledi. Búginde osy baǵytta atqarylǵan júıeli jumystardyń nátıjesinde 313 myń gektar jer sýarylyp, sharýalar der kezinde ónimin jınap alǵan, dep habarlaıdy QazAqparat tilshisi.

Bıyl aýa raıynyń qolaısyzdyǵynan sý tapshylyǵy týyndap, sý mólsheri shamamen 30% tómendep ketken. Osyǵan oraı ekologııa mınıstri Maǵzum Myrzaǵalıev pen oblys ákimi Ómirzaq Shókeev birneshe márte kórshiles Ózbekstan eline baryp, kelissóz júrgizgen bolatyn.

Nátıjesinde transshekaralyq «Dostyq», «Hanym», «Ashynaý» kanaldarynda sý jiberý týraly kelisim jasalyp, sharýalar sýdan taryqpaǵan. Sebebi, kórshi elden sý kelisim boıynsha jiberilip otyrdy.

Sonymen qatar oblystaǵy aǵyn sýǵa jaýapty «Qazsýshar» RMK Túrkistan oblystyq bólimshesiniń mamandary táýlik boıy jumys istep, sharýalardy barynsha sýmen qamtyǵan.

Atalǵan mekeme óńirdegi tik drenajdy uńǵymalary qazyp, sorǵy beketterin ornatý jáne sý bógetterin salý jumystaryn júrgizgen. Sondaı-aq, Jetisaı jáne Otyrar aýdandarynda dándi daqyldarǵa sý jetispeýshiligi máselesin sheshý úshin bólimshe avtomatty sý bógetterin salyp, aımaqtaǵy barlyq egin alqaptaryn qurǵaqshylyqtan aman alyp qalǵan. Nátıjesinde maqta, kúrish, kókónister men jemister bıyl bitik shyqqan.

Búgingi tańda óńirdegi egin alqaptaryn sýarý naýqany 95% aıaqtalyp, Shardara sý qoımasyna tirshilik nári jınaqtalýda.

«Qazir óńirdegi sýarý júıeleri shamamen 63% jumys istep tur. Barlyq kanaldar jerdi qazý arqyly tartylǵan. Ol birinshiden sýdyń sińip ketýine sebep bolsa, ekinshiden qum quramy da úgilgish bolyp keledi. Sondyqtan jylyna 1-2 márte arnalardy tazartyp otyramyz. Aldaǵy ýaqytta kezeń-kezeńimen arnalardy betondaımyz «,- deıdi «Qazsýshar» RMK Túrkistan oblystyq bólimshesiniń D. Konovalov.

Sýǵa jaýapty mamandardyń aıtýynsha, óńirde sý ótkizgish 6 nysan qaıta jańǵyrtylýda. Túlkibas aýdanynda – 2 nysan jańartylyp jatsa, onyń aıasynda aýdandaǵy aýyldardyń birine baratyn 5 bóget jáne 13 magıstraldy kanal qaıta iske qosylmaq.

«Kemerbastaý aýylyn aýyz sýmen qamtıtyn «Uzyn» kanaly jóndelip, betondalýda. Kanal retke keltirilgen soń, aýyl turǵyndary burynǵy sýarmaly jerlerin ıgere alady. Búginde jóndeý jumystaryna 300-ge tarta tehnıka tartylǵan», - deıdi «Qazsýshar» RMK Túrkistan oblystyq bólimshesi dırektorynyń orynbasary Serik Pirimqulov.