Túrkistan oblysynda Almatydaǵy tártipsizdikke qatysy bar 5 kúdikti ustaldy
Polıtseıler Jetisaı qalasynda jedel is-sharalar júrgizý barysynda qonaqúıdiń birinen Almaty men Túrkistan oblystarynyń úsh er adamdy ustady. Olardyń ekeýi buryn urlyq úshin sottalǵandar.
Tártip saqshylary olardan 550 000 teńge aqsha, esirtki, erler men áıelderdiń brend zattaryn tárkiledi.
Sondaı-aq, Túrkistan qalasyna kire beristegi Yntymaq blok beketinde eki kúdikti qolǵa tústi. Polıtseıler olardyń júkterinen Nikon jáne Canon fotoapparattarynyń jıyntyǵyn, altyn áshekeıler, Samsung markaly 2 jáne iPhone -12 markaly bir telefon, 1 noýtbýk pen eki jańa krossovka tárkiledi.
Belgili bolǵandaı, olar 5 qańtar kúni jappaı tártipsizdik barysynda Almaty qalasyndaǵy Tóle bı kóshesinde ornalasqan «Tehnodom» dúkenine kirgen. Sodan keıin ǵımaratta turǵan er adamdy uryp, tehnıka quraldaryn, altyn men aıaqkıimdi alyp ketken.
Kúdiktiler Túrkistan oblysyna qalaaralyq avtobýspen kelgen. Túrkistan qalasyna kireberiste komendant saǵatyn eskere otyryp, júrgizýshiden toqtaýdy suraǵan jáne qarańǵyny paıdalanyp, jaıaý júrip ótpekshi bolǵan.
Búginde kúdikti bes adamǵa qatysty QR QK 191-baby «Tonaý» boıynsha sotqa deıingi tergeý amaldary júrgizilýde. Barlyǵy qamaýǵa alyndy. Qazirgi kezde Túrkistan oblysynyń tergeýshileri olardyń Almaty qalasynda qandaı maqsatta bolǵanyn anyqtaýda.