Túrkistan oblysynda áleýmettik nan baǵasy kóterilmeıdi

TÚRKІSTAN. QazAqparat - Túrkistan oblysynda 1-surypty unnan jasalǵan áleýmettik nan baǵasynyń kóterilýine jol berilmeıdi. Óńirde áleýmettik nan baǵasynyń ósýine qarsy júıeli sharalar júzege asýda, dep habarlaıdy QazAqparat oblys ákiminiń baspasóz qyzmetine silteme jasap.

Memleket basshysy Qasym-Jomart Toqaevtyń tapsyrmasyn oryndaý maqsatynda qaladaǵy saýda oryndary men naýbaıhana ókilderiniń qatysýymen «Túrkistan» ÁKK AQ turaqtandyrý qorynyń shuǵyl jınalysy ótkizilip, baǵanyń kóterilýine jol bermeý sharalary talqylandy.

Máseleni sheshý úshin Qostanaı oblysynan Túrkistan qalasyna bıdaıdy arzan baǵamen jetkizý týraly kelissózder júrgizildi.

Osydan keıin «Aqjol» JShS naýbaıhanasymen kelisimge qol jetkizildi.

Naýbaıhanada kún saıyn 1-surypty unnan 25 myń dana pisirilgen nan óndirip, Túrkistan qalasyndaǵy suranystyń 80% qamtamasyz etedi.

Oblys ákimdiginde júıeli jumys júrgizilip, nátıjesinde arzan baǵadaǵy shıkizatpen qamtamasyz etilip jatqanyn atap ótti. Kúnine 2 myń dana áleýmettik nan barlyq dúkenderge bólinip jetkiziledi jáne 75 teńgeden satylady. Bul búkil respýblıka boıynsha básekege qabiletti baǵalardyń biri.

Naýbaıhana aıyna 1-surypty unnan 375 tonna nan shyǵarady, ol qaladaǵy 20 saýda núktesinde satylady, bul azyq-túlik satatyn saýda oryndarynyń jalpy sanynyń 66%-yn quraıdy. Sonymen qatar, qazirgi ýaqytta áleýmettik mańyzy bar azyq-túlik taýarlaryna baǵany turaqtandyrý maqsatynda Túrkistan oblysynyń azyq-túlik dúkenderine, áleýmettik nan ónimderin shyǵaratyn qaıta óńdeý kásiporyndaryna (dıirmender, naýbaıhanalar jáne t.b.) nesıe berý máselesi qarastyrylýda.

Esterińizge sala keteıik, «Túrkistan» ÁKK AQ turaqtandyrý qory áleýmettik mańyzy bar azyq-túlik taýarlarynyń baǵasyn retteý jáne oblystyń bazarlary men saýda núktelerindegi baǵalardyń turaqtanýyn qamtamasyz etedi.