Túrkistan oblysynda alaıaqqa sengen turǵyndar 30 mln teńgesinen aıyryldy

TÚRKІSTAN OBLYSY. QazAqparat – Túrkistan oblysynda aýyl turǵyndaryn memleketten qaıtarymsyz nesıe alyp beremin dep 30 mln teńge qaryzǵa batyrǵan kúdikti ustaldy, dep habarlaıdy QazAqparat Polisia.kz-ke silteme jasap.

Saýran aýdandyq polıtsııa bólimine alaıaqtyń qurbany bolǵan 40-tan astam aýyl turǵyny shaǵym túsirdi. Olardyń aıtýynsha, tanys er adam memleketten qaıtarymsyz nesıe alýǵa kómektesetinin aıtyp, aldyn ala árqaısysynan 300 myńnan eki mln teńgege jýyq aqshalaryn alǵan. Odan keıin alaıaq bir jyl boıy turǵyndarǵa bergen ýádesin oryndamaı ne aqshasyn qaıtarmaı ábigerge salǵan.

Atalǵan fakti QR QK-niń 190-baby (Alaıaqtyq) boıynsha tirkeldi. Osy jaıtqa baılanysty alaıaqtyq qylmysyn ashý maqsatynda tájirıbeli polıtseılerden jedel-tergeý toby quryldy. Jedel-izdestirý is-sharalarynyń nátıjesinde kúdiktiniń jeke basy anyqtalyp, polıtsııaǵa jetkizildi. Ol buryn sotty bolǵan jumyssyz, Túrkistan turǵyny bolyp shyqty. Tergeý barysynda ustalǵan er adam aldaý jolymen alǵan 30 mln teńgege jýyq qarajatty óziniń qajettiligine jaratyp jibergenin moıyndady. Qazir kúdikti qamaýǵa alynyp, sotqa deıingi tergep-tekserý amaldary júrgizilip jatyr.